काठमाडौं । प्रचण्ड–नेपाल समूहले घोषणा गरेको आम हड्ताल सफल बनाउन सडकमा उत्रिएका नेता तथा कार्यकर्ता पक्राउ परेका छन् । नेकपा स्थायी कमिटी सदस्य अष्टलक्ष्मी शाक्य, हितमान शाक्य, अमृता थापालगायत काठमाडौं उपत्यकाबाट ७८ जना नेता तथा कार्यकर्ता पक्राउ गरिएको महानगरीय प्रहरी परिसरका एसएसपी अशोक सिंहले जानकारी दिए ।
सिंहका अनुसार सामाखुसीमा आन्दोलनकारीले एउटा ट्याक्सी जलाएका छन् । धादिङका कुम्ब नारायण श्रेष्ठले चलाउँदै गरेको प्रदेश–३–०१–००२ ज ५८८१ नम्बरको ट्याक्सी आन्दोलनकारीले जलाएका हुन् । यस्तै अन्य ठाउँमा पनि आन्दोलनकारीले सवारीसाधनमा तोडफोड गरेको उनले बताए ।
संवैधानिक आयोगहरुमा नियुक्तिको विरोध गर्दै नेकपा प्रचण्ड–माधव समूहले आज आम हड्ताल गर्ने घोषणा गरेको छ । बुधबार अख्तियार दुरुपयोग अनुसन्धान आयोगलगायत संवैधानिक निकायका पदाधिकारीहरुलाई शपथ खुवाइएको थियो ।
आयोगहरूमा सिफारिस भएका पदाधिकारीहरुको संसदीय सुनुवाइबिना नै नियुक्ति र पद तथा गोपनीयताको शपथग्रहण गराइएको भन्दै त्यसकै विरोधमा नेकपाले आमहड्ताल घोषणा गरेको हो ।