भारत । बलिउड बादशाह ऋतिक रोशनको पुरानो सभ्यतामा आधारित सिनेमा मोहेन्जे दारो र अक्षय कुमारको एउटा नेभीको सिपाहीको सत्य कथामा आधारित सिनेमाको कडा प्रतिस्पर्धाको पहिलो दिन अक्षय कुमारको सिनेमा अगाडि देखिएको छ । 

दुवै सिनेमा एकै दिनको रिलिज डेट लिएका थिए । सन् २०१६ का सिनेमा मध्ये सबैभन्दा चर्चित यी दुई सिनेमा मध्ये बक्स अफिसमा कसले बाजी मार्छ भनेर करिब चार महिना अघिदेखि अनुमानको खेल चलिरहेको थियो । आशिष गवारेकरको मोहेन्जे दारोमा भारु १०० करोड खर्च लागेको छ भने टिनु सुरेश देशाईले बनाएको रुस्तममा आधामात्र अर्थात ५० करोड भारु खर्च गरिएको छ । 

पहिलो दिन ऋतिकको सिनेमा साढे दुई हजार सिनेमा घरमा लागेको थियो भने अक्षयको सिनेमा दुई २००० हलहरुमा प्रदर्शन भएको थियो । 

पहिलो दिनको कलेक्सनको आधारमा रुस्तमले भारु १४ करोड कमाउने अनुमान इन्टरनेशनल बिजनेश टाइम्सको अनलाइन भर्सनले गरेको छ भने  सोही अनलाइनले मोहेन्जेदारोले करिब १२ करोड भारु आंकलन गरेको छ । 

सिनेमाको बजेट र सिनेमा हलको संख्याको आधारमा रुस्तमको कमाई मोहेन्जे दारोको भन्दा निकै बढी हो । तर, पहिलो दिनको सिनेमाको व्यापारले मात्र कसले बाजी मार्छ भनेर आकंलन गर्नु हतार हुने सिने पण्डितहरु बताउँछन् । 

दुवै सिनेमा दर्शक माझ आउनुपूर्व नै बलिवुड बादशाह सलमान खान, रणवीर सिंह, करन जोहर जस्ता व्यक्तिले ट्वीट गरेर रुस्तमलाई समर्थन जनाएका थिए । यता मोहेन्जो दारोले बलिवुडका हस्तीहरुको समर्थन बटुल्न सकेको छैन । तर, ऋतिक रोशनले एक कदम अघि बढेर रुस्तमको समर्थनमा ट्वीट गरेपछि भने यो टकराव धेरै घिनलाग्दो हुनबाट रोकिएको थियो । त्यतिमात्र नभई ऋतिक र अक्षय दुवैले एक अर्काका लागि आफ्नो सिनेमाको विशेष प्रदर्शन पनि गरिसकेको समाचार छ । 

ऋतिकको हिरोइनमा पूजा हेगडे छिन भने अक्षयको इलियाना डी क्रुज । मोहेन्जोदारो सिनेमा इन्दु घाटीको सभ्यताको बेलाको कथा हो भने रुस्तम एक नेभी अफिसरको हत्याको सत्य घटनामा आधारित सिनेमा हो । एजेन्सीको सहयोगमा