काठमाडौँ । भानु मावि उर्फ दरबार हाइस्कुलमा आजबाट पूर्ण रुपमा भौतिक रुपमा कक्षा सञ्चालनमा आएको छ । भूकम्पपछि स्कुल परिसरमै टहरामा पढाइरहेको विद्यालय पछि वाल्मीकि क्याम्पसको परिसरमा अल्पकालीन सिकाइ केन्द्र (टीएलसी)मा परिणत भएको थियो ।
भूकम्पले भवन भत्के पनि विद्यालय आजको मितिसम्म एकदिन बन्द नभएको निमित्त प्राध्यानाध्यापक अखिलेष आजादले बाह्रखरीसँग बताए । लकडाउनमा समेत अनलाइनमा कक्षा–१ देखि १० सम्म पढाइ भइरहको उनको दाबी छ ।
यस्तै, गएको कात्तिकमै भवन उद्घाटन भएपछि विद्यालय वाल्मीकिबाट मूल भवनमै सरेको थियो । त्यसपछि भौतिक रुपमै विद्यालयमा यही माघ ४ गतेदेखि १२ गतेसम्म जाँच भएको थियो । नर्सरीदेखि कक्षा–१० सम्म पढाइ हुने दरबार हाइस्कुल चीन सरकारको पूर्ण सहयोगमा निर्माण भएको हो ।
हाल उक्त स्कुलमा ३१४ जना विद्यार्थी छन् । नयाँ भौतिक संरचना र पूर्वाधारसँगै विद्यालयमा अभिभावक र विद्यार्थीको आकर्षण बढीरहेको निमित्त प्राध्यानाध्यापक आजादले बताए । उनी भन्छन्, “बाहिरबाट हेरेर दरबार भव्य देखे पनि भित्र कोठा धेरै छैनन् । ६०० भन्दा बढी विद्यार्थी धान्न सकिन्न ।”
यस्तै, विद्यालयको आधा हिस्सामा संस्कृत माध्यमिक विद्यालय चलिरहेको छ । विद्यालयको आफ्नै खेल्ने मैदान छैन । विद्यालयमा विज्ञान प्रयोगशाला, कम्प्युटर ल्याब, पुस्तकालय, खेलकुद मैदानलगायत अतिरिक्त प्रतिभा अभ्यास गर्ने व्यवस्था भए पनि अहिले ती सबैको प्रयोग गर्न सम्भव नभएको विद्यालयले जनाएको छ ।
फाइल तस्बिर ।