जलालाबाद (अफगानिस्तान) । अफगानिस्तानको पूर्वी भाग नान्गार्हारमा रहेको अफगान सैन्य शिविरलक्षित शनिबार भएको एक आत्मघाती बम आक्रमणमा परी कम्तीमा आठ सुरक्षा अधिकारी मारिएका छन् ।
विस्फोटक पदार्थले भरिएको गाडी उक्त शिविरभित्र लगेर विस्फोट गराइएको थियो । यसैबीच, तालिबानी प्रवक्ता जबिहुल्लाह मुजाहिदले तालिबान लडाकु समूहले यो आक्रमण गरेको दाबी गरेका छन् ।
प्रायः अशान्त नै भइरहने नान्गार्हार प्रान्तमा शनिबार बिहान सबेरै उक्त आक्रमण भएको बताइएको छ । सो प्रान्तमा यसअघि पनि तालिबान लडाकु समूहले सरकारी सेनालक्षित बारम्बार घातक हमला गर्दै आएका छन् ।
गत वर्ष वासिङटनसँग गरेको सम्झौताअनुरुप प्रतिबद्धता तालिबानले नगरेको पेन्टागनले भनाइ आएको दुई दिनपछि यो आक्रमण भएको छ । सो सम्भौतामा तालिबान लडाकु समूहले हिंसा–हत्या नगर्ने र अलकायदा आतंककारी समूहसँग रहँदै आएको तालिबानको सम्बन्धबिच्छेद हुनुपर्ने सर्त रहेको थियो ।
सैन्य शिविरमा भएको यस आत्मघाती आक्रमणमा परी आठ सुरक्षा अधिकारी मारिएका नान्गार्हारमा गभर्नरद्वारा जारी विज्ञप्तिमा जनाइएको छ । तर, नान्गार्हार प्रान्तीय काउन्सिलका उपप्रमुख आज्माल ओमारले भने यस आक्रमणमा परी १५ सैनिकको मृत्यु हुनुको साथै अन्य पाँच घाइते भएका बताएका छन् ।
जलालाबाद सहरनजिकै विस्फोटक पदार्थले भरिएको अर्को गाडी कब्जा गरिएको प्रान्तीय गभर्नरको कार्यालयले जानकारी दिएको छ । केही समययता नान्गार्हार प्रान्तमा इस्लामिक स्टेट्स (आईएस) आतंककारी समूहले कैयौँ घातक आक्रमणहरू गरेका छन् ।
यसैबीच, शनिबार नै राजधानी सहर काबुलमा सडक किनारमा राखिएका दुईवटा बम विस्फोट भएका छन् । तर, यस विस्फोटमा परी कोही पनि हताहत भएका छैनन् । रासस/एएफपी
फाइल तस्बिर ।
