म्युजिकल चेयर

एकपछि अर्को बाहिरिन्छन्
खप्टिँदै थुपारिन्छन् कुर्सीहरू

अन्त्यमा
एउटै व्यक्ति बाँकी हुन्छ बाहिरिन
र ऊ बस्न पाउँदछ
सबै कुर्सीहरू खप्टिएको
कुर्सीहरूको रासमाथि !
सबै बाहिरिइसकेपछि ।

दुनियाँको खेल !
    
० ० ०

बुकमार्क

म त 
मुर्झाएर भुइँंमा झरेको फूल थिएँ
तिमीले उठायौ मलाई
र
चुम्यौ

तिमीले आफ्नो जीवनशास्त्रको
सबैभन्दा महत्त्वपूर्ण मन्त्र पहिल्याउने ठाउँमा 
चिनो बनायौ

म
माटो त यसै बन्थेँ
तर अहिले
जीवित भएको छु
जीवनका सूत्रहरूबीच
जिन्दगीका मन्त्रहरूबीच ।