काठमाडौं । आबुधाबी टी-१० लिगमा नेपाली राष्ट्रिय क्रिकेट टोलीका अलराउन्डर सोमपाल कामी आबद्ध मराठा अरबियन्सले विजयी सुरुवात गरेको छ । आबुधावीमा बिहीबार भएको पहिलो खेलमा मराठाले नर्दन वारियर्सलाई ५ विकेटले हराएको हो ।

नर्दन वारियर्सले दिएको १२८ रनको विजयी लक्ष्य पछ्याएको मराठाले निर्धारित १० ओभरमा ५ विकट गुमाउँदै १३१ रन बनायो । मराठाका लागि अब्दुल बन्गासले अर्धशतकीय पारी खेले । २८ बल खेलेका उनले ७ चौका र ५ छक्काको सहयोगमा ७३ रन बनाए ।

त्यस्तै मोहमद हाफिजले १९ रनको योगदान गरे । बलिङतर्फ नर्दनका लागि फावियन एलेनले दुई विकेट लिए । त्यस्तै महेस ठेकेसान र रियाद इम्रिदले समान एक-एक विकेट लिए ।

यसअघि टस हारेर पहिले बलिङ गरेको नर्दनका लागि लेन्डल सिमोन्सले ५४ रनको अर्धशतकीय पारी खेले । 
बलिङतर्फ मराठाका लागि मुक्तर अलीले एक विकेट लिए ।

आजको खेलमा सोमपाल कामीले पहिलो १ ओभर बलिङ गरेर मात्र ८ रन खर्चेका थिए । त्यस्तै अन्तिम ओभर बलिङ गरेका सोमपालले २० रन खर्चिए ।

पहिलो ओभरको दोस्रो बलमा सोमपालले गरेको बलिङ मराठाका खेलाडीले क्याच गर्न सकेका थिएनन् । त्यस्तै अन्तिम ओभरको अन्तिम बलमा अरबियन्सका खेलाडीले सोमपालको बल क्याच गर्न छुटाएका थिए । त्यस्तै सोमपालले निकोलस पुरानको विकेटमा क्याच पनि गरेका थिए । मुक्तर अलीको बलमा सोमपालले क्याच गरे ।