काठमाडौं । प्रधानमन्त्री कप एकदिवसीय राष्ट्रिय पुरुष क्रिकेट प्रतियोगितामा प्रदेश २ ले विभागीय टोली नेपाल पुलिस क्लबलाई १७० रनको लक्ष्य दिएको छ ।
काठमाडौंको मूलपानी क्रिकेट मैदानमा टस हारेर पहिले ब्याटिङ गरेको प्रदेश २ ले निर्धारित ४७ ओभरमा ९ विकेट गुमाउँदै १६९ रन बनाएको हो । प्रदेश २ का लागि हरिशंकर शाहले अर्धशतकीय पारी खेले । ८४ बल खेलेका उनले ५ चौका र १ छक्काको सहयोगमा ५३ रन बनाएका हुन् ।
त्यस्तै आदिल अन्सारीले १५ रन बनाउँदा हिमान्सु दत्तले १६ रन बनाए । बलिङतर्फ पुलिसका लागि ललित राजवंशीले सर्वाधिक ४ विकेट लिए । त्यस्तै सागर ढकालले २ विकेट लिँदा पवन सरार्फले १ विकेट लिए ।
आजको खेलमा जित निकाल्दै पुलिस आफूलाई सेमिफाइनलमा पुगाउने योजनामा छ । तीन खेल खेलेको पुलिसको ४ अंक छ । समूह ‘बी’मा रहेको पुलिस आजको खेलमा पराजित भएमा प्रतियोगिताबाट बाहिरिनेछ ।
यसै समूहबाट वाग्मती प्रदेश सेमिफाइनलमा प्रवेश गरिसकेको छ । लुम्बिनी प्रदेश भने पुलिसको नतिजाको पर्खाइमा छ ।