काठमाडौं । वैदेशिक रोजगार विभागका महानिर्देशक कुमारप्रसाद दहालले कट्टु र फाटेको जुत्ता लगाएर आएका पीडितको उजुरी लिउँ कि नलिउँ ? भनेर वैदेशिक रोजगार व्यवसायीहरुलाई प्रश्न गरेका छन् । २१ बुँदे माग लिएर आइतबार विभाग पुगेका व्यवसायीहरुसँग महानिर्देशक दाहालले यस्तो प्रश्न गरेका हुन् ।
विभागमा पुगेका वैदेशिक रोजगार व्यवसायी र महानिर्देशकबीच केहीबेर भनाभनसमेत भएको थियो । दहालले यो व्यवसायमा विगत लामो समयदेखि विकृति कायम रहेको बताएका थिए । उनले आफुहरु नियमभित्र बसे मात्र विकृति अन्त्य हुनसक्ने बताएका थिए ।
व्यवसायीहरुले पत्रकारको सहयोग लिएर विभागले छापा मारेकोप्रति आपत्ति जनाएका थिए । जवाफमा दहालले यो ‘मिडियाको इथिक’ भित्र रहेको बताएका थिए । महानिर्देशक दाहालले मिडियाले जनचासोका विषयमा समाचार सम्प्रेसण गर्ने पनि बताएका थिए ।
व्यवसायीले पाएको अनावश्यक दुःख तथा झन्झटको विरोध गर्न आइतबार व्यवसायीहरु विभाग पुगेका थिए । बिहान १० बजे व्यवसायीहरु बुद्धनगरस्थित विभागको कार्यालयमा धर्ना दिन पुगेका थिए । व्यवसायीहरुले कोरोनाका कारण एक वर्ष काम गर्न नपाएको र भर्खरै तंग्रँदै गरेको व्यवसायलाई विभागले विभिन्न बहानामा अवरोध गरेको जनाएका छन् ।