काठमाडौं । सावित्रा भण्डारीले ह्याट्रिकसहित चार गोल गर्दा विभागीय टिम एपीएफ क्लबले राष्ट्रिय महिला लिग फुटबलमा लगातार दोस्रो जित निकालेको छ ।

आइतबार भएको खेलमा एपीएफले विराटनगर महानगरपालिकालाई ७-० गोल अन्तरले पराजित गरेको हो । एन्फा कम्प्लेक्स सातदोबाटोमा भएको खेलमा एपीएफलाई जित दिलाउन सावित्रा भण्डारीले ह्याट्रिकसहित चार गोल गरिन् । यस्तै अनीता केसीले २ गोल गर्दा सरु लिम्बूले एक गोल गरिन् ।

खेलमा सरु लिम्बू ‘प्लेयर अफ दी म्याच’ चुनिइन् । जितसँगै एपीएफ लिगको शीर्ष स्थानमा उक्लिएको छ । एपीएफले २ खेलमा ६ अंक जोडेको छ ।

पराजित विराटनगरले दुई खेलमा एक अंक जोडेको छ । पहिलो खेलमा एपीएफले चन्द्रपुर नगरपालिकालाई ६-० ले हराएको थियो । पहिलो खेलमा वालिङसँग बराबरी खेलेको विराटनगरको यो पहिलो हार हो ।