काठमाडौं । नेपाल उद्योग वाणिज्य महासंघका अध्यक्ष शेखर गोल्छाले भ्रष्टाचारसम्बन्धी सर्वेक्षणको प्रतिवेदन छिटो सार्वजनिक गर्न भन्सार विभागसँग माग गरेका छन् । भन्सार विभागले गरेको सर्वेक्षण सराहनीय भएको तर प्रतिवेदन सार्वजनिक नभएको भन्दै छिटो सार्वजनिक गर्न माग गरेका हुन् ।
अन्तर्राष्ट्रिय भन्सार दिवसको अवसरमा आइतबार महासंघको कार्यालयमा आयोजित कार्यक्रममा अध्यक्ष गोल्छाले विभागले गरेको उक्त सर्वेक्षणमा आफूले पनि सहभागिता जनाउन पाएको तर अहिलेसम्म प्रतिवेदन हेर्न नपाएको गुनासो गरे । प्रतिवेदन सार्वजनिक भए जनसमुदायमा सकारात्मक सन्देश जाने पनि गोल्छाको भनाइ छ ।
यस्तै भन्सारबाट छुटेको समान राजस्व अनुसन्धान विभागले बाटोमा रोक्ने गरेको गुनासो पनि अध्यक्ष गोल्छाले गरे । यसबाट व्यापारीहरु त्रसित हुने मात्र नभई व्यावसायिक विकृतिसमेत उत्पन्न हुने खतरा बढेको बताए । भन्सार मूल्यांकन र वर्गीकरण यथार्थपूरक हुनुपर्नेमा समेत अध्यक्ष गोल्छाको जोड छ ।
कार्यक्रममा अर्थ मन्त्रालयका राजस्व-सचिव रामशरण पुडासैनीले सरकार व्यवहारिक रुपमा निजी क्षेत्रमैत्री रहेको दाबी गरे । निजी क्षेत्रको समस्या सरकारले नसुनीकन र निजी क्षेत्रको आवश्कताअनुसार कानुनहरु संशोधन नभएसम्म आर्थिक विकासका गतिविधि बढ्न नसक्ने स्पष्ट पारे ।
कार्यक्रममा उद्योगी व्यवसायीहले भन्सार सम्बन्धमा भएका विवाद समाधान गर्न संयन्त्र निर्माण गर्न माग गरेका छन् । सरकार र निजी क्षेत्र एक अर्काका परिपूरक भएकाले निजी क्षेत्रको विकास विना मुलुकमा आर्थिक विकास सम्भावना नभएको पनि उद्योगी व्यवसायीहरुले बताएका छन् ।