काठमाडौं । वाग्मती प्रदेश प्रधानमन्त्री कप एकदिवसीय पुरुष राष्ट्रिय क्रिकेट प्रतियोगिताको सेमिफाइनलमा प्रवेश गरेको छ ।
आइतबार भएको खेलमा लुम्बिनी प्रदेशसँग बराबरी खेलेको वाग्मती सेमिफाइनलमा पुगेको हो । काठमाडौंको मूलपानी क्रिकेट मैदानमा वाग्मतीले दिएको २२१ रनको लक्ष्यसहित जवाफी ब्याटिङ गरेको लुम्बिनीले ४८ ओभरमा अलआउट हुँदै २२० रन बनाउन सक्यो ।
लुम्बिनीले ९ विकेट गुमाउँदा चाहिएको एक रन नपुग्दै दीपेन्द्र रावत रनआउट भएपछि खेल ‘टाइ’ भएको थियो । लुम्बिनीका लागि कप्तान कृष्ण कार्की र प्रकाश केसीले समान ४१-४१ रन बनाए ।
त्यस्तै सौरभ खनालले ३४ रन बनाउँदा देव खनालले २६ रन बनाए । बलिङतर्फ वाग्मती प्रदेशका लागि विपिन आचार्यले सर्वाधिक ४ विकेट लिए । त्यस्तै गौतम केसीले दुई विकेट लिए ।
यसअघि टस जितेर पहिले ब्याटिङ गरेको वाग्मतीले ५० ओभरमा ९ विकेट गुमाएर २२० रन बनायो । वाग्मतीका लागि आदिल खान र इशान पाण्डेले अर्धशतकीय पारी खेले ।
८७ बल खेलेका आदिलले ५५ रन बनाए । त्यस्तै ५३ बल खेलेका इशानले ५१ रनको योगदान गरे । बलिङतर्फ लुम्बिनीका लागि देवेन्द्र रावलले सर्वाधिक ३ विकेट लिए । त्यस्तै कृष्ण कार्की र सन्दीप सुनारले २-२ विकेट लिए ।
आजको खेलमा बराबरी खेलेको वाग्मतीले आफूलाई सेमिफाइनलमा पुर्याएको छ । वाग्मतीले यसअघि पुलिस, सुदूरपश्चिम र प्रदेश २ लाई हराएको थियो ।
समूह ‘बी’ को वाग्मतीले ४ खेलमा ७ अंक जोडेको छ । लुम्बिनी ३ खेलमा ५ अंक जोडेर दोस्रो स्थानमा छ । अब लुम्बिनीको सेमिफाइनल पुग्न पुलिस पराजित हुनुपर्नेछ ।