काठमाडौं । नेपाल कम्युनिस्ट पार्टी (नेकपा) ले आज काठमाडौंमा शक्ति प्रदर्शन गर्‍यो । संसद् विघटनविरुद्ध संघर्षरत नेकपाले राजधानीको विभिन्न नौ स्थानबाट जुलुस निकाल्यो । प्रदर्शनीमार्गअघि कोणसभामा परिणत भएको थियो । 

जुलुसले उपत्यकाको ट्राफिक व्यवस्थापन अस्तव्यस्त बनाएको थियो । कार्यक्रम सञ्चालक तथा नेकपा स्थायी कमिटी सदस्य पम्फा भुसालका अनुसार गृह मन्त्रालयले ड्रोनमार्फत कार्यक्रम खिचेको थियो । नेकपाले आज एक लाख जनता सडकमा उतार्ने उद्घोष गरेको थियो । सोहीअनुसार जनता सडकमा उपस्थित भएको नेकपाका नेताहरु बताउँछन् । 
जुलुसपछिको कार्यक्रमलाई स्थायी कमिटी सदस्य घनश्याम भुसाल, वरिष्ठ नेता झलनाथ खनाल र अध्यक्षद्वय पुष्पकमल दाहाल प्रचण्ड र माधवकुमार नेपालले सम्बोधन गरे ।

प्रचण्ड-नेपालको निष्कर्ष आत्मालोचना गर्नुपर्छ
सम्बोधनका क्रममा नेताहरु प्रधानमन्त्री केपी शर्मा ओलीमाथि खनिए । तथापि अध्यक्षद्व प्रचण्ड-नेपालले ओलीलाई मात्रै गाली गरेर नहुने र आत्मसमीक्षा गर्नुपर्ने निष्कर्षमा पुगेका छन् । प्रचण्डले ओलीलाई सुधार्न नसकिएको भन्दै कार्यक्रममै आत्मालोचनासमेत गरे ।

"अब केपी ओलीलाई मात्रै दोष दिएर हामी चोखै हुन्छजस्तो लागेको छैन । म तपाईंहरु माझ जनसमुदायलाई साक्षी राखेर भन्न चाहन्छु भने केपी प्रवृत्तिप्रति उदार भएर भित्रभित्र संघर्ष गर्ने उनको जस्तो काम गर्न दिएर त्यस्तो खालको भूल गर्ने छैनौं," प्रचण्डले भने ।

संसद् विघटनविरुद्ध नेकपाको शक्ति प्रदर्शन 

कार्यक्रममा अर्का अध्यक्ष नेपालले पनि आफूहरुबाट भएको त्रुटि समीक्षा गर्नु आवश्यक रहेको बताए । "सुरुदेखि उहाँका व्यवहार आपतिजनक थिए । सुध्रिन्छन् कि भनेर कोसिस गर्‍यौं । तर, सुध्रिएनन् । हामीले आफ्नो तर्फबाट कति प्रयास अझै गर्नुपर्थ्यो । पर्दैनथ्यो। कुन ठाउँमा त्रुटि भयो । त्यो समीक्षा गर्नुपर्दछ ।"

नेपालले आफूलाई गणतन्त्रविरोधी मान्छेलाई प्रधानमन्त्री बनाएको भन्ने दोष दिने गरेको बताए । उनले भने, "त्यो गल्तीलाई म स्वीकार गरौंला । मैले सुधार्ने प्रयास गरेको हुँ समीक्षा गरौंला ।"

प्रचण्डको चेतावनी- छोएर त देखाऊ
प्रधानमन्त्री केपी शर्मा ओली निकटहरुले प्रतिनिधिसभा विघटनविरुद्को प्रदर्शनमा सहभागी हुन चाहने कर्मचारी, पेसाकर्मीहरुलाई रोकेको बताए । उनले नरोक्न चेतावनी पनि दिए ।

"प्रदर्शनमा सहभागी हुने पेसाकर्म, कर्मचारीहरुको रेकर्ड राख्ने रे केपी ओलीका साइबर स्यालहरुले । अनि कारबाही गर्ने भनेर धक्की दिएको सुनेँ । व्यवसायीहरुको रेकर्ड राख्ने रे । छोएर त देखाऊ," उनको चेतावनी थियो ।

कालीबहादुर खामप्रति कटाक्ष- आमाको दूध चुसेर भएन, बाबुको घुँडो
केहीअघिको एक कार्यक्रममा ओलीले जनयुद्धका कमान्डर कालीबहादुर खाम खोइ ? भन्दै प्रश्न गरेका थिए । सोही प्रश्नको जवाफ प्रचण्डले दिए । पछिल्लोपटक कालीबहादुरलाई ओलीले पार्टीको काममा खटाएको चर्चासमेत चलेको थियो । 

नेकपाको विरोधसभाले सडक अस्तव्यस्त, हिँडेरै मैदान पुगे खेलाडी !

"कालीबहादुर खाम खोइ अरे ? त्यो कालीबहादुर विचरा आफैँले केही गरेको त होइन । उसको मुद्दा ठीक ढंगले हल होस् भनेर १०-११ वर्षदेखि लगातार लागेको छु । अहिले त कालीबहादुर तपाईंलाई त प्रचण्डले हेर्दैन । जनमुक्ति सेनाका कमान्डरलाई," प्रचण्डले भने, "जसलाई मैले १० वर्ष हुर्काएर, माया गरेर एउटा ठाउँमा पुर्‍याएको ती मान्छेको अब केपीले संरक्षण गर्ने रे । आमाको दूध चुसेर भएन बाबुको घुँडो । योभन्दा लाजमर्दो अरु हुन्छ ?"

घनश्यामले भनेको भन्यै- 'कमरेड ओली'
नेकपाका नेताहरुले ओली अब कम्युनिस्ट नरहेको टिप्पणी गरिरहेका छन् । उनी अब कमरेड नभन्ने भन्दै नेताहरु भाषण गरिरहेका छन् । तर, कार्यक्रममा बोलेका भुसालले भने भाषणमा 'कमरेड ओली' धेरैपटक प्रयोग गरे । उनले ओली निकटहरुलाई ‘ओलीका साइबर स्याल’ को संज्ञा दिए । ओली साइबर स्यालका नेताहरु भएको टिप्पणीसमेत गरे । 

ओली भन्छन्- साँघुरा गल्लीमा मान्छे भर्दैमा आमसभा ?

ओलीले फर्काए जवाफ- २३ गते देखाइदिन्छौं
प्रचण्ड-नेपाल पक्षको शक्ति प्रदशर्नको विषयमा ओलीले आजै टिप्पणी गर्न भ्याए । उनले साँघुरा गल्लीमा ५-७ हजार भेला उत्साहित भएको भन्दै कटाक्षसमेत गरे । प्रधानमन्त्रीले माघ २३ गते राजधानीमा जनप्रदर्शन देखाउनेसमेत बताए । प्रचण्ड-नेपाल पक्षले पनि सोही दिन प्रदर्शन गर्ने उद्घोष यसअघि नै गरिसकेको छ । "आमसभा भन्ने कुरा २३ गते काठमाडौंमा हेर्नुहोला । हामी २३ गते जन-परिचालनको झलक दिन्छौं, कास्टिङ गर्छौं । २३ गते हामी देखाइदिन्छौं," उनले बताए । 

-तस्बिरहरु : हरिशजंग क्षेत्री/बाह्रखरी