काठमाडौं । प्रधानमन्त्री कप एकदिवसीय राष्ट्रिय पुरुष क्रिकेट प्रतियोगिताअन्तर्गत वाग्मती प्रदेशले लगातार तेस्रो जित निकालेको छ ।
शुक्रबार भएको खेलमा वाग्मतीले प्रदेश दुईलाई ६ विकेटको पराजित गरेको हो । काठमाडौंको मूलपानी क्रिकेट मैदानमा प्रदेश २ ले वाग्मती प्रदेशलाई जितका लागि दिएको १८० रनको लक्ष्य वाग्मतीले ४८ ओभर २ बलमा ४ विकेट गुमाउँदै १८१ रन बनाएको हो ।
वाग्मतीका लागि पृथु बास्कोटाले अर्धशतकीय पारी खेले । ७५ बल खेलेका उनले ४ चौका र १ छक्काको सहयोगमा ५३ रन बनाए । त्यस्तै बिभस्तु थापाले ४७ रन बनाउँदा आकाश थापाले ३२ रन बनाए ।
बलिङतर्फ प्रदेश २ का लागि हरिकृष्ण शाहले दुई विकेट लिँदा विशाल सुसालिङ र कुमार थापाले समान एक-एक विकेट लिए । यसअघि टस जितेर पहिले ब्याटिङ गरेको प्रदेश २ ले ४१ ओभर २ बलमा सम्पूर्ण विकेट गुमाउँदै १७९ रन बनाएको थियो ।
प्रदेश २ का लागि विवेक यादवले अर्धशतकीय पारी खेले । ७४ बल खेलेका उनले ३ चौका र ३ छक्काको सहयोगमा ६६ रन बनाए ।
त्यस्तै कुमार थापाले २२ रन बनाउँदा राहुलप्रताप सिंहले १८ रनको योगदान गरे । बलिङतर्फ वाग्मती प्रदेशका लागि गौतम केसीले सर्वाधिक ४ विकेट लिए । १० ओभर बलिङ गरेका उनले १ मेडन ओभर सहित २९ रन खर्चे ।
त्यस्तै रामनरेश गिरीले दुई विकेट लिँदा नन्दन यादव, तिलक भण्डारी र विपिन आचार्यले समान एक-एक विकेट लिए ।