काठमाडौं । कारोना भाइरको महामारीले केही कम रुप लिएसँगै विश्व खेलकुद क्रियाकलापहरू पुनः नियमित हुने मौका पाएका छन् । त्यसैअनुसार नेपालमा खेलकुद प्रतियोगिताहरू अलिअलि भए पनि सञ्चालनमा आउन थालेका छन् ।
नेपाली क्रिकेटसँगै फुटबलको पनि सुरुवात भएको छ । जिल्ला स्तरमा पनि धेरै खेलकुद क्रियाकलाप सञ्चालनमा आइरहेका छन् । कोरोनाका कारण फिट्नेसमा केही कमजोर बनेका खेलाडीहरू एकैपटक मैदान छिर्दा उनीहरूको स्वास्थ्यमा केही समस्या देखिनु सामान्य हो ।
यस्तो अवस्थामा खेलाडीहरूका लागि टिमले उपयुक्त मेडिकल सामग्रीको व्यवस्था गर्नुपर्ने हुन्छ । जसल गर्दा खेलाडीको स्वास्थ्यमा केही समस्या आइहाले पनि तुरुन्तै स्वास्थ्य सामग्रीले केही राहत मिलोस् । तर, बुधबारबाट सुरु भएको राष्ट्रिय महिला लिगमा एक चित्र फरक देखियो । कोरोनाका कारण लामो समयपछि मैदान छिरेका खेलाडीहरूमा केही फिटनेसको कमी देखिन्थ्यो । विभागीय टोली त्रिभुवन आर्मी क्लब र अर्को विभागीय टोली नेपाल पुलिस क्लबबीच खेल चलिरहेको थियो ।
त्यसमा नेपाल पुलिस क्लबका खेलाडी दुईपटक मैदानमा लडे । मैदानमा भएका रेफ्रीले उनीहरूका लागि फिजियोलाई बोलाए । नेपाल पुलिस क्लबकी फिजियो एउटा ‘मुभ’ लिएर खेलाडीसम्म पुगिन् । पहिलोपटक मुभ लिएर खेलाडीसम्म पुगेकी उनी अर्कोपटक मैदानको राखेपतर्फको लाइनमा घाइते भएर पुग्दा पनि उनी एउटा मुभ बोकेर दौडिन् । खेलाडी अशक्त भएर मेडिकल सामग्रीको लागि पर्खिरहेको अवस्थामा विभागीय टोलीसँग भने खासै सामग्री थिएन ।
मेडिकल भाषामा भन्नु पर्दा खेलको समयमा टिमको फिजियोले सम्पूर्ण मेडिकल सामग्रीसहित तयारी हुन आवश्यक छ । जस्तै फर्स्ट एडदेखि लिएर जुनसुकै अवस्थामा फिजियोले तयारी हुन आवश्यक छ । नेपाली राष्ट्रिय पुरुष फुटबल टोलीका फिजियो आविष्कार पुडासैनी पनि खेलको समयमा खेलाडीको स्वास्थ्यमा जुनसुकै अवस्था आउने भएकाले फिजियो आवश्यक मेडिकल सामग्रीसहित रहनुपर्ने बताउँछन् ।
“खेलको समयमा खेलाडीको स्वास्थ्यमा जुनसुकै अवस्था पनि आउन सक्छ । त्यसका लागि टिमको फिजियो तयारी अवस्थामा रहनुपर्छ । फर्स्ट एडदेखि लिएर जस्तोसुकै जटिल अवस्था पनि आउन सक्छ खेलमा । त्यसैले मेडिकल किटको आवश्यक महत्त्वपूर्ण छ,” फिजियो पुडासैनीले बाह्रखरीसँगको कुराकानीमा भने ।
यता नेपाल पुलिस क्लबका टिम म्यानेजर भरत शाहले क्लबभित्र स्टाफहरूको सरुवा हुने अवस्था भएकाले नयाँ फिजियो आउँदा खेलबारे जानकारी नभएकाले मेडिकल किट नबोकेर गएको बताए । “पुलिस टिममा फिजियो नयाँ आएकी हुन् । उनलाई खेलको विषयमा धेरै ज्ञान छैन । उनले मेडिकल टिक ल्याए पनि प्रयोगमा भने आएन । आगामी खेलमा हामी यस्तो गल्ती दोहोर्याउने छैनौं,” शाहले भने ।