काठमाडौं । नेपालमा कोभिड–१९ विरुद्धको पहिलो खोप भारतबाट भित्रिने निश्चित भएको छ ।

खोपका ल्याउनका लागि भारतलगायतका विभिन्न मुलुकसँगै विश्व स्वास्थ्य संगठनमार्फतसमेत पहल भइरहेका बेला भारत सरकारले छिमेकी राष्ट्रहरुलाई अनुदानमा खोप दिने निर्णय गरेको हो । नेपालले भारतबाट कति खोप पाउने र कहिले ल्याउने भन्नेबारे आज टुंगो लाग्दैछ । पहिलो चरणमा ल्याइएको खोप कसलाई दिने भन्ने यसअघि नै टुंगो लागिसकेको छ ।

यी हुन् नेपालमा कोभिड–१९ विरुद्धको खोपको पहिलो भागीदार
१. स्वास्थ्यकर्मी तथा सेवक : यो सूचीमा सरकारी तथा निजी स्वास्थ्य संस्थामा कार्यरत् स्वास्थ्यकर्मी, प्रशासनिक तथा सरसफाइमा खटिएका कर्मचारी र स्वास्थ्य सेवाका लागि फिल्डमा खटिने कर्मचारीलाई राखिएको छ । यो वर्गमा नेपालको कुल जनसंख्याको ३ प्रतिशत नागरिक पर्दछन् ।

२. ज्येष्ठ नागरिक तथा दीर्घरोगी : खोपको दोस्रो प्राथमिकतामा ५५ वर्षमाथिका दीर्घरोगी एवम् नागरिक छन् । जुन नेपालको जनसंख्यामा १२.२५ प्रतिशत छन् ।

३. ४० देखि ५४ वर्षसम्मका दीर्घरोगी : ४० देखि ५४ वर्षसम्मका दीर्घरोगी नागरिकलाई तेस्रो प्राथमिकतामा राखिएको छ । नेपालमा यो वर्गका नागरिक कुल जनसंख्याको ३.६८ प्रतिशत छन् ।

४. माइग्रेन्ट श्रमिक : खोप दिइने वर्गको प्राथमिकतामा बाहिरबाट आएर नेपालमा काम गरिरहेका श्रमिकलाई समेत राखिएको छ । उनीहरुलाई श्रमिकलाई चौथो चरणमा खोप दिइनेछ । नेपालमा यस्ता श्रमिक १ प्रतिशत रहेको स्वास्थ्य तथा जनसंख्या मन्त्रालयको तथ्यांक रहेको छ ।

५. ४० देखि ५४ वर्षका नागरिक : खोपको प्राथमिकतामा यी नागरिक पाँचौँ नम्बरमा छन् । नेपालमा ४० देखि ५४ वर्ष उमेर समूहक नागरिक पनि ३.६८ प्रतिशत छन् ।

६. १५ देखि ३९ वर्षका नागरिक : अन्तिम चरणमा खोप पाउनेमा युवा वर्ग छन् । १५ देखि ३९ वर्ष उमेर समूहका नागरिकलाई अन्तिम चरणमा खोप दिने सरकारको तयारी छ । नेपालको जनसंख्याको २२.५५ प्रतिशत नागरिक यही उमेर समूहका छन् ।

खोपको यो प्राथमिकीकरण सबै खोप आइपुग्दासम्मको योजना हो । नेपालको पूर्वाधार र अन्य प्राविधिक क्षमताका आधारमा सुरुको चरणमा दुईपटक गरी खोप ल्याइनेछ । त्यसमा पनि पहिलोपटक ३ प्रतिशत र दोस्रोपटक १७ प्रतिशतलाई पुग्ने र बाँकी खोप विभिन्न चरणमा ल्याउने सरकारको योजना रहेको छ ।

फाइल तस्बिर ।