काठमाडौं । प्रधानमन्त्री कप एकदिवसीय क्रिकेट प्रतियोगितामा लुम्बिनी प्रदेशले प्रदेश नम्बर–२ लाई पराजित गरेको छ ।
मंगलबार भएको खेलमा लुम्बिनीले प्रदेश–२ लाई ७७ रनले हरायो । प्रतियोगितामा लुम्बिनीले विजयी सुरुवात गरेको हो ।
लुम्बिनीले दिएको २५८ रनको लक्ष्य पछ्याएको प्रदेश–२ ले ४२.४ ओभरमा सबै विकेट गुमाएर १८० रन मात्रै बनाउन सक्यो ।
पहिले ब्याटिङ गरेको लुम्बिनीका लागि सन्दीप रजालीले र सौरभ खनालले अर्धशतकीय इनिङ्स खेले । सन्दीपले ८३ रनको योगदान दिँदा सौरभले ५६ रन बनाएका थिए । यस्तै, विक्रम भुसालले ३६ रन बनाए । सन्दीप सुनार ११ रनमा आउट हुँदा कप्तान कृष्ण कार्कीले १० रन जोडेका थिए ।
प्रदेश–२ का हरिशंकर साहले ३ तथा दिब्यान्सु मल्लिकले २ विकेट लिए ।
आफ्नो पहिलो खेलमा पराजित भएको प्रदेश–२ का लागि विवेक यादवले ५१ रन बनाए । सुधीर चौधरीले ४२ रन, महबुब आलमले ३१, हरिशंकर शाहले २२ रनको योगदान गरे ।
प्रदेश–२ विरुद्ध लुम्बिनीका अनिल खरेलले ४ विकेट लिए । विक्रम भुसाल र दीपेन्द्र रावतले समान २/२ तथा कृष्ण कार्की र अमित तामाङले १/१ विकेट लिए ।
तस्बिरहरुः सुनील प्रधान/बाह्रखरी ।