काठमाडौं । प्रधानमन्त्री कप एकदिवसीय क्रिकेट प्रतियोगितामा लुम्बिनी प्रदेशले विजयी सुरुवात गरेको छ ।
मंगलबार भएको खेलमा लुम्बिनी प्रदेशले प्रदेश २ लाई ७७ रनले हराएको हो । कीर्तिपुरस्थित त्रिवि क्रिकेट मैदनमा भएको खेलमा लुम्बिनीले जित हात पारेको हो । लुम्बिनीले दिएको २५८ रनको लक्ष्य पछ्याएको प्रदेश २ ले ४२.४ ओभरमा सबै विकेट गुमाएर १८० रन मात्रै बनाउन सक्यो ।
आफ्नो पहिलो खेलमा पराजित भएको प्रदेश २ का लागि विवेक यादवले अर्धशतकिय इनिङ्स खेले। उनले ४८ बलमा ३ छक्का र ३ चौकाको मद्दतले ५१ रन बनाए । यस्तै प्रदेश २ का लागि सुधीर चौधरीले ४२ रन, महबुब आलमले ३१ रन, हरिशंकर शाहले २२ रन बनाए ।
प्रदेश २ विरुद्ध अनिल खरेलले उत्कृष्ट बलिङ गरे । जसमा उनले १० ओभरमा २ मेडन ओभरसहित २४ रन खर्चेर ४ विकेट लिएका हुन् । यस्तै, विक्रम भुसाल र दीपेन्द्र रावतले समान २/२ विकेट लिए भने कृष्ण कार्की र अमित तामाङले १/१ विकेट लिए ।
यसअघि पहिलो ब्याटिङ गरेको लुम्बिनीका लागि सन्दीप रजालीले र सौरभ खनालले अर्धशतकीय इनिङ्स खेले । सन्दीपले ८३ रनको योगदान दिँदा सौरभले ५६ रन बनाएका थिए ।
यस्तै विक्रम भुसालले ३६ रन बनाएका थिए । सन्दीप सुनार ११ रनमा आउट हुँदा कप्तान कृष्ण कार्कीले १० रन जोडेका थिए ।
प्रदेश २ का हरिशंकर साहले ३ विकेट लिए । त्यस्तै दिब्यान्सु मल्लिकले २ विकेट लिएका थिए । समूह ‘बी’ मा रहेको लुम्बिनीले २ अंक जोडेको छ ।