काठमाडौं । पत्रकार तथा साहित्यकार नारायण वाग्लेले ‘पल्पसा क्याफे’मा चलचित्र निर्माण गर्ने अनुमति मागिएको बताएका छन् । ‘पल्पसा क्याफे’ नाटक निर्माण युनिटले आज काठमाडौंमा आयोजना गरेको पत्रकार सम्मेलनमा पत्रकार वाग्लेले दुईजना निर्देशकले पल्पसा क्याफेको कथामा चलचित्र बनाउनका लागि अनुमति माग पनि आफूले चासो नदेखाएको बताएका हुन् ।
“दुई पटक यो उपन्यासको कथामा चलचित्र बनाउनुपर्यो भन्दै आउनु भएको थियो । तर, मैले प्रोत्साहन गरिनँ,” उनले भने, “उपन्यास भर्खर लेखेको थियो । मलाई त्यो बेला पानामै सुरक्षित रहोस् भन्ने लाग्यो ।”
करिब १५ वर्षपछि नाटक निर्देशक विमल सुवेदीले नाटकमा रुपान्तरण गर्छु भने र उनको ‘कन्सेप्ट’ सुनेपछि प्रभावित भएर अनुमति दिएको बताए ।
अहिले पनि ‘पल्पसा क्याफे’मा चलचित्र बनाउन अनुमति दिने वा नदिनेबारे आफूले केही नसोचेको भन्दै चलचित्र निर्माणको अनुमति माग्न आउने निर्देशक र उसले विगतमा गरेको कामले निर्धारण गर्ने स्पष्ट पारे ।
नाटकका रुपमा आउन लागेको ‘पल्पसा क्याफे’ भने राम्रो हुने अपेक्षा गरेको उनले बताए ।
‘पल्पसा क्याफे’लाई विमल सुवेदीले निर्देशन गर्दैछन् ।
नाटकको मुख्य पात्रका रुपमा अभिनेत्री स्वस्तिमा खड्का देखिँदैछिन् । उपन्यासलाई सुरज सुवेदीले नाटकमा रुपान्तरण गरेका हुन् ।
नाटक आउँदो वैशाखमा मञ्चन गर्ने तयारी भइरहेको निर्देशक सुवेदीले जानकारी दिए ।
उपन्यास ‘पल्पसा क्याफे’ मदन पुरस्कार विजेता पुस्तक हो ।