काठमाडौं । तत्कालीन संविधानसभाका अध्यक्ष सुवास नेम्वाङले संविधानमा प्रधानमन्त्रीलाई विघटनको व्यवस्थै नराखिएको बताएका थिए । तर, अहिले उनी मौन छन् । नेम्वाङ मौन रहेको विषय सोमबार सर्वोच्च अदालतको संवैधानिक इजलासमा उठ्यो ।
प्रतिनिधिसभा विघटन असंवैधानिक भन्दै दायर मुद्दामा बहसका क्रममा अधिवक्ता सरोजकृष्ण घिमिरेले नेम्वाङ अहिले मौन रहेको प्रसंग उठाएका थिए । नेम्वाङको सन्दर्भ उठेपछि प्रधानन्यायाधीश चोलेन्द्रशमशेर जबराले ठट्यौली पारामा भने, “संविधान निर्माणका बेला बोल्या एउटा कुरा होला । संविधान बनिसकेपछि बोल्ने अर्कै होला ।”
न्यायाधीश सपना प्रधान मल्ल पनि नेम्वाङको प्रसंग आएपछि अधिवक्ता घिमिरेसँग जिज्ञासा राखिन् । “संविधानसभाको अध्यक्षले औपचारिक, अनौपचारिक रुपमा बोल्या कुरा संविधानको मर्म हो कि ? मस्यौदामा लेखिएको कुरा हो ?” उनको प्रश्न थियो, “लेखेको कुराले रिफ्लेक्सन गर्छ कि बोलेको कुराले ?”
संविधानसभाका अध्यक्ष रहेका नेम्वाङ अहिले प्रतिनिधिसभा विघटनको पक्षमा छन् । तर, केही समयअघि उनले भनेका थिए, “अहिले प्रधानमन्त्रीले विघटन गर्नसक्ने हामीले संविधानमा व्यवस्थै राखेनौं ।” नेम्वाङले अहिले बोली फेरेको भन्दै उनको पुरानो भिडियो भाइरल भएको थियो ।
-फाइल तस्बिर