काठमाडौं । साविकको विजेता टोली वायर्न म्युनिखले जर्मन बुन्डेसलिगा फुटबलमा जित निकालेको छ । आइतबार राति भएको खेलमा वायर्नले फ्रेईवर्गलाई २–१ गोल अन्तरले पराजित गरेको हो ।
वायर्नलाई जित दिलाउन रोबर्ट लेवान्डोस्की र थोमस मुलरले एक–एक गोल गरे । फ्रेईवर्गका निल्स पिटरसेनले एक गोल फर्काए ।
खेलको सातौं मिनेटमा लेवान्डोस्कीले गोल गर्दै बायर्नलाई अग्रता दिलाएका थिए । पहिलो हाफमा एक गोल गरेको वायर्नले दोस्रो हाफमा थप एक गोल गरेको थियो ।
६२ औं मिनेटमा पिटरसेनले फ्रेईवर्गका लागि बराबरीमा फर्काए । ७४ औं मिनेटमा मुलरले गोल गर्दै वायर्नलाई २–१ को जित दिलाए ।
जितसँगै बायर्नले शीर्ष स्थानमा ४ अंकको अग्रता बनाएको छ र बायर्नले १६ खेलमा ३६ अंक जोडेको छ । पराजित फ्रेईवर्ग २३ अंक जोडेर नवौं स्थानमा छ ।