काठमाडौं । संगीतकार सम्भुजित बास्कोटाले नयाँ पुस्ताका संगीतकर्मीको सपनालाई केन्द्रमा राखेर अगाडि बढ्न आग्रह गरेका छन् । अधिकांश नयाँ पुस्ताले राम्रो भविश्यको सपना बुन्दै संगीत क्षेत्रमा आउने गरेको भन्दै उनीहरुको उज्वल भविश्य सुनिश्चित गर्ने काम अग्रज संगीतकारहरुको रहेको बास्कोटाको भनाइ छ ।
“सबैलाई बसन्त सापकोटा, राजनराज शिवाकोटी, राजन ईशान बन्ने सपना हुन्छ । अरु गाडी चढेको देख्दा म पनि यस्तै हुन्छु भन्ने सोचले आजको पुस्ता यो क्षेत्रमा लागिरहेको छ । तर के सबैको अवस्था त्यस्तै हो । अधिकांश संगीतकर्मीको अवस्था कस्तो छ ?,” सम्भुजित भन्छन्, “त्यसैले संगीतकार संघले चालेको कदम, लक्ष्मण शेष र उहाँको टिमले सुरु गरेको कपिराइट र रोयल्टीको अभियानमा साथ दिन म सबैलाई आग्रह गर्छु । सबै एकसाथ भएर लागेको अवस्थामा मात्र हामीले जित्न सक्छौं ।”
मन, वचन र कर्मले स्रस्टाको अधिकार प्राप्तीको अभियानमा लाग्न उनको सुझाव छ । “यो राम्रो कामका लागि मेरो सधैं साथ छ,” संगीतकार संघको दशौं साधारण सभामा उनले भने, “काम भइरहेको छ । त्यसको परिणाम त पर्खिनै पर्छ । तर हामीले यति भुल्नु हुन्न– एजनालाई दुःख पर्दा अर्को हास्नु हुँदैन । हामी पनि भोलि बाँच्ने समाज यही हो । हामीलाई पनि त्यो दुःख आउन सक्छ । त्यसैले आज हामी एकाकार भएर हिँड्नुपर्छ ।”