गजल – १
तपाईं भन्नुहुन्छ सम्बन्ध त अजम्बरी जोडिनुपर्छ ।
कसरी बिर्सिउँ हरेक मुनाले मदनसँग बिछोडिनुपर्छ ।
उचाइमा पुगेर धरातल नबिर्सनुस् न महोदय,
चिललाई आहारा खोज्न पनि जमिनमै ओर्लिनुपर्छ ।
मात्र कसैको पहिचानको दिवाना बन्नेहरू,
अहंकारसाथ भन्छन् प्रेम त मनले गरिनुपर्छ ।
आकाशले माथि छु भनेर जति नै घमण्ड गरे पनि
सत्यता ऊ स्वयं रुँदा त धर्तीमै बर्सिनुपर्छ ।
० ० ०
गजल – २
बाँच्नैपर्छ गहु्रङ्गो यो, जिन्दगानी बोकेर ।
मर्दा कसले लगेको छ, आम्दानी बोकेर ।
मलाई मेलम्चीको आश्वासन नदिनुहोस् मन्त्रीज्यू
म आफैं बाँचेकी छु आँखामा, पानी बोकेर ।
एक मुरी सपना एक आहाल आँसुसँगै
विदेशिएको छ ऊ साथमा, राहादानी बोकेर ।
खुसी त त्यही दिन सकियो जब सम्बन्ध टुट्यो
बाँचेकी छु त केवल तिम्रो मेरो, कहानी बोकेर ।
घोडा चढी आउने राजकुमारको सपना छैन
किनकि राजै पराइ भए अर्की रानी बोकेर ।