काठमाडौं । विभागीय टिम आर्मीले प्रधानमन्त्री कप राष्ट्रिय एक दिवसीय प्रतियोगितामा सुखद सुरुवात गरेको छ । कप्तान विनोद भण्डारीको शतकमा आर्मीले सुखद सुरुवात गरेको हो ।
शुक्रबार भएको उद्घाटन खेलमा आर्मीले गण्डकी प्रदेशलाई ९९ रनले पराजित गरेको हो । त्रिवि क्रिकेट मैदानमा आर्मीले दिएको २८८ रनको लक्ष्य पछ्याएको गण्डकी १२ बल छँदै १ सय ८९ रनमा अलआउट भयो ।
गण्डकीका लागि समिर कँडेलले अर्धशतकीय पारी खेले । त्यस्तै विपिन खत्री ३७ रनमा अविजित रहे । अर्जुन कुमारले ३६ र दीपक डुम्रेले २६ रन बनाए । विष्णु पाण्डेले १२ रन बनाए ।
बलिङतर्फ आर्मीका राजेश पुलामीले ५ विकेट लिए । यस्तै, भीम सार्कीले ३ तथा आकाश चन्द र रोहित पौडेलले १-१ विकेट लिए ।
कीर्तिपुरस्थित त्रिवि मैदानमा टस जितेर पहिले ब्याटिङ गरेको आर्मीले निर्धारित ओभरमा ६ विकेट गुमाएर २८७ रन बनाएको थियो ।
आर्मीका लागि विनोद भण्डारीले शतकीय इनिङ्स खेले । विनोदले ९ चौका र ५ छक्काको मद्दतले १११ रन बनाए ।
यस्तै, राजु रिजालले ४५ रन बनाउदा लोकेश बलले ४२ र राजेश पुलामी मगरले ३८ रनको योगदान दिए । भीम सार्की १५, रोहित पौडेल १० र हरिकृष्ण झा १४ रनमा आउट भए ।
बलिङतर्फ गण्डकीका विपिन खत्री र विशाल पौडेलले समान २ विकेट लिए । दीपेश खत्री र चन्द्र पौडेलले एक-एक विकेट लिए ।