पोखरा । पूर्वप्रधानमन्त्री एवं नेपाली कांग्रेसका सभापति शेरबहादुर देउवाले चुनावका लागि तयार रहन र जनताका घरघरमा पुग्न नेता तथा कार्यकर्तालाई निर्देशन दिएका छन् । प्रधानमन्त्री तथा नेकपाको एक समूहका अध्यक्ष केपी शर्मा ओलीले प्रतिनिधिसभा विघटन गरेर मध्यावधि निर्वाचन घोषणा गरेपछि कांग्रेसभित्र पनि चुनावमा जाने वा आन्दोलन चर्काउने भन्ने बारेमा देउवा र इतरपक्षबीच मतभेद छ ।
सुरुदेखि नै देउवा निर्वाचनको पक्षमा देखिएका छन । सोही निर्णय उनले बिहीबार पनि दोहोर्याए । पर्वतको शंकरपोखरीमा आयोजित हरिदत्त स्मृति प्रतिष्ठानको कार्यक्रममा सहभागी हुन पुगेका देउवाले जनता नै देशको मालिक भएको हुँदा उनीहरूसमक्ष जान नेपाली कांग्रेस नडराएको बताएका हुन् ।
यता प्रतिनिधिसभा विघटनबारे सर्वोच्चमा विचाराधीन मुद्दा भएको भन्दै आफूले केही बोल्न नमिल्ने बताए । अहिले देशैभरि प्रधानमन्त्रीले चालेको संसद् विघटनविरुद्ध नेकपाकै ओलीइतरको पुष्पकमल दाहाल प्रचण्ड र माधवकुमार नेपाल नेतृत्वको नेकपासहितका अन्य दलहरूले दिनहुँजसो विरोध प्रदर्शन, सभा र र्याली गरिरहेका छन् ।
उक्त विरोधका कार्यक्रमहरूलाई पनि देउवाले सडकबाट न्यायपालिकालाई दबाब दिन नहुने भन्दै जवाफ दिएका छन् । “हाम्रो पार्टीले पहिलेदेखि नै अदालतलाई दबाब दिने काम गरेका छैन । सडकबाट यो गर, त्यो गर भन्नुपर्दैन । अदालतलाई हामीले कुनै प्रेसर दिँदैनौं,” उनले भने, “अदालतले विवेकका साथ निर्णय गर्नेछ । विचाराधीन मुद्दा छ, त्यसमा यो गर त्यो गर भन्न पाउँदैन । जुलुस निकालेर धम्क्याएर तर्साएर यो गर त्यो गर भन्दैन । हिजो पनि गरेन, आज पनि गर्दैन । कांग्रेसले न्यायिक स्वतन्त्रता, स्वतन्त्र न्यायपालिकालाई मान्दछ ।”
प्रतिनिधिसभा विघटनको विषयमा विचाराधीन मुद्दा भन्दै तटस्थ बसे पनि मध्यावधि निर्वाचनको तयारी गर्न उनले नेता कार्यकर्तालाई निर्देशन दिए । अदालतले के गर्छ भन्दा पनि चुनावमा केन्द्रित हुन उनले जोड दिए ।
“जनताले हराए हराउँछ, जिताए जिताउँछ । अदालतले भोट हाल्ने त होइन नि । तपाईंहरू जनतामा जानुहोस् । वैशाखमा चुनाव भइहाल्यो भने भोट माग्नुहोस्, भएन भने दुई वर्ष पछाडिको लागि माग्नुहोस्,” उनले थपे, “त्यसैले जनताको घरघरमा जानुहोस्, मलाई विश्वास छ, जनताले थाहा पाइसकेका छन् । यो कम्युनिस्टले दु:ख मात्र दिन्छन् भन्ने बुझेका छन् ।”
देशमा भइरहेका हरेक गतिविधिको निगरानी गरिरहेको र कसले कहाँ के-के गरिरहेका छन्, त्यसको हिसाबकिताब लिने उनको भनाइ छ । जनताहरूले पहिले कम्युनिस्टलाई भोट हालेको र अहिले बदमास रहेको बुझेको उनले बताए । तर, सुरुमा भोट हाल्ने पछि बदमास भन्न नपाइने उनको तर्क छ ।
यस्तै, अब देशभरि घुम्ने र जनतामा पुग्ने उनले प्रतिबद्धता पनि सोही कार्यक्रमबाट जनाएका छन् । “म अब देशभरि घुम्छु । जनतामा जानुपर्छ । कोभिडको महामारी छ । जान गाह्रो पनि छ । तर जनताको सुखदु:ख बुझ्नुपर्छ । जनताको घरघरमा जानुपर्छ । जनता मालिक हुन्, अहिले वैशाखमा चुनाव भए पनि दुई वर्षपछि भए पनि,” उनले भने । सुरक्षा निकायलाई पनि उनले जनताले कर तिरेको पैसाबाट तलब खाने हुँदा निष्पक्ष भएर जनताको सेवा गर्न आग्रह गरे ।
-फाइल तस्बिर
