बीबीसी । अमेरिकी राष्ट्रपति डोनाल्ड ट्रम्पले गत हप्ता संसद् भवनमा भएको भयानक हिंसामा आफूले समर्थकहरुलाई क्यापिटलतर्फ लाग्न दिएको सन्देश पूर्णरुपमा उचित भएको बताएका छन् ।
हिंसा भड्काएको आरोपमा डेमोक्रेट्सहरुले उनीमाथि महाअभियोग लगाउने तयारी गरिरहेका बेला उनले ती सबै आरोप अर्थहीन भएकामा जोड दिएका हुन् ।
यही जनवरी २० मा जो बाइडेनले राष्ट्रपतिको शपथग्रहण गरेलगत्तै ट्रम्पले ह्वाइट हाउस छाड्नेछन् । यसैबीच, प्रतिनिधिसभाका सदस्यहरुले यसै बुधबार उनीमाथि महाअभियोग लगाउनेसम्बन्धी मतदान गर्ने अपेक्षा रहेको छ ।
गत साता ट्रम्पको उक्साहटपूर्ण सन्देशका पछाडि लागेर हजारौँ समर्थकहरु अमेरिकी संसद्मा जबर्जस्ती घुसी तोडफोड गर्दै आतङ्क मच्चाएपछि सो दिनलाई अमेरिकी इतिहासकै भयानक मानिएको छ । जसमा पाँचजनाको मृत्यु भएको थियो भने ६० जना प्रहरीसहित दर्जनौँ घाइते भएका थिए ।
त्यस घटनापछि पहिलोपटक सार्वजानिकरुपमा देखा परेका ट्रम्पले यस्तो भनेका हुन्, “मेरो विचारमा बरु महाअभियोग जारी गरियो भने त्यसले चाहिँ हाम्रो देशमा ठूलो खतरा निम्त्याउन सक्छ अनि देशवासीमाझ आक्रोश बढाउनेछ । र, म हिंसा चाहँदिनँ ।” मेक्सिकोसँगको सिमानामा निर्माण गरिएको पर्खालको निरीक्षणका लागि ह्वाइट हाउसबाट बाहिरिँदै गर्दा उनले त्यसो भनेका हुन् ।