काठमाडौं । भारत, उत्तर प्रदेशको बुलन्दसहर जिल्लामा एक पसल सञ्चालकलाई ‘ठाकुर’ ब्रान्डको जुत्ता बिक्री गरेको आरोपमा प्रहरीले पक्राउ गरेको छ । बजरंग दलका एक कार्यकर्ताले उनीविरुद्ध उजुरी गरेका थिए ।
टाइम्स अफ इन्डियामा छापिएको समाचारअनुसार घटना बुलन्दसहरस्थित गुलावठीको हो । बजरंग दलका सदस्य विशाल चौहानले एक पसलमा जुत्ताको सोलमा ठाकुर लेखिएको देखे । पसल सञ्चालकसामु गएर त्यसको विरोध गरे । उनले जातिगत भावनामा ठेस पुर्याएको आरोप लगाए ।
त्यससँगै पसलबाहिर ठूलो संख्यामा मानिस जम्मा भए । पसल सञ्चालक मोहम्मद नासिरले उनीहरुलाई सम्झाउने कोसिस गरे कि ठाकुर जुत्ताको एक ब्रान्ड हो ।
विशाल चौहानले यसबारेमा प्रहरीमा उजुरी गरे । उजुरीमा उनले पसल सञ्चालक र जुत्ता बनाउनेविरुद्ध कडा कारबाहीको माग गरे ।
उक्त घटनाको भिडियोहरु अहिले भाइरल भइरहेको छ । जसमा पसल सञ्चालक र बजरंग दलका कार्यकर्ताबीच बहस भइरहेको देखिन्छ ।
पसल सञ्चालक नासिर र जुत्ता बनाउने कम्पनीविरुद्ध उजुरी दर्ता गरिएको छ । नासिरलाई सोधपुछका लागि हिरासतमा राखिएको जनाइएको छ । बीबीसीबाट ।