काठमाडौं । नेपाली कथानक चलचित्र ‘परदेशी-२’ को सुटिङ गरिरहेका निर्देशक नारायण रायमाझी छायांकनमा कोरोनाको त्यति धेरै असर नपरेको बताउँछन् । कोरोना संक्रमणको त्रास नसकिए पनि आमनागरिकले सामान्य रुपमा लिन थालिसकेको छायांकनका क्रममा आफूले अनुभूत गरेको उनी सुनाउँछन् ।
“हामीले पाल्पा र काठमाडौंमा छायांकन गर्यौं । तर कोरोना संक्रमणको त्रास कतै पनि महसुस गर्नु परेन । छायांकनका बेला मास्क खोल्न कलाकारलाई भन्दा उहाँहरुले अलिकति असहज मान्नुबाहेक अरु केही पनि महसुस भएन,” निर्देशक रायमाझी भन्छन्, “बरु हामीले अहिले छायांकनमा जानुअगाडि दुईपटक फ्लोरमा जाने प्रयास गरेका थियौं । तर, जान सकेका थिएनौं । गएपछि कुनै अफ्ठ्यारो परिस्थिति झेल्नु परेन ।”
उनले कोरोना संक्रमणको जोखिम छ भनेर सुटिङ युनिट घटाएनन् । गत फागुनमा जतिजनाको युनिट थियो त्यति नै परिचालन गरे ।
उनले छायांकनमा जानुअगाडि कलाकार र केही मुख्य व्यक्तिहरुको पीसीआर परीक्षण गराएका थिए, त्यसबाहेक अरुको गराएनन् । तर बिमा भने सबैको गराएका थिए ।
“कलाकार र केही मेजर व्यक्तिहरुको मात्रै पीसीआर परीक्षण गराएर छायांकनमा गएका थियौं । सबैको पीसीआर परीक्षण गराइएन । तर, बिमा भने पहिला नै गरिसकेका थियौं,” नारायण भन्छन्, “बाहिर ननिस्कँदा मात्रै हो घरबाहिर निस्किएर हेर्दा सबैतिर भिड छ । जनजीवन सामान्य भएजस्तो लाग्छ । त्यसैले हामीले छायांकनमा कोरोनाकै कारण कुनै असहजपन पाएनौं । सम्झौता पनि परेनौं ।”
चलचित्र निर्माता संघले भने अधिकतम सावधानी अपनाउनुपर्नेमा जोड दिएको छ । जोसँग पनि संक्रमण हुनसक्ने र त्यसको असर अन्ततः सम्पूर्ण सुटिङ युनिट, परिवार र निर्मातालाई नै पर्ने भएकाले पर्याप्त सावधानी अपनाउनुपर्ने संघ बताउँछ ।
“बजार, पसल, सार्वजनिक सवारी, हवाई यातायातलगायतमा भिड छ भन्दैमा हामीले पनि बेपरवाह भएर काम गर्नु हुँदैन । भोलि कोही एकजनालाई संक्रमण भयो भने त्यसको मार पर्ने अन्ततः निर्मातालाई नै हो । स्वास्थ्यमा क्षति बेहोर्नुपर्ने व्यक्ति स्वयंले नै हो । त्यसैले यसलाई कम आँक्नु हुँदैन,” निर्माता संघका अध्यक्ष आकाश अधिकारी भन्छन्, “तर राज्यले पनि हामीलाई मात्रै होइन समाजका अरु पक्षलाई पनि निगरानी गर्नुपर्यो । स्वास्थ्य सुरक्षा मापदण्ड सबै क्षेत्रमा पालना गराउनुपर्यो ।”
छायांकनमा जाने व्यक्तिको पीसीआर परीक्षण गराउनुपर्ने, प्रत्येक दुई/दुई घण्टामा टेम्प्रेचर परीक्षण गर्नुपर्ने, पूरै युनिट क्लोज क्याम्पमा बस्नुपर्ने, आउटडोर सुटिङमा जाँदा एउटा मात्रै होटेलमा बस्नुपर्नेमा उनको जोड छ । सुटिङ युनिटभित्रै पनि अनावश्यक धेरै घुलमिल हुन नहुने, आवश्यक परेको अवस्थामा मात्रै दुईमिटरभन्दा कमको दूरीमा बस्ने कुरामा पूर्ण सचेत हुन उनी आग्रह गर्छन् ।
युरोप तथा अमेरिकामा इन्टिमेसी सिनका लागि ‘इन्टिमेसी डाइरेक्टर’ नै खडा गरेर स्वास्थ्य सुरक्षा अपनाइरहेका छन्, नेपालमा त्यो सम्भव छैन भन्ने जिज्ञासामा आकाश भन्छन्, “कति कुरा समाचारमा मात्रै आउने हुन्छन् । मुख्य कुरा भनेको पीसीआर परीक्षण नै हो । हामी परिवार पनि एकै ठाउँमा बसिरहेका छौं । कारण हामीसँग कोरोना संक्रमण छैन भन्ने आस्वस्त भएर हो । त्यसैले कोरोना परीक्षणमा नेगेटिभ रिपोर्ट आइसकेपछि र क्लोज क्याम्पमा बसिसकेपछि धेरै हदसम्म सुरक्षित भइन्छ । बाँकी भनेको अन्तरंग सिनहरुका लागि दूरी कायम नगर्नेबोहक अरु समय भौतिक दूरी कायम गर्ने हो । होटेल एउटै प्रयोग गरेपछि धेरै हदसम्म सुरक्षित भइन्छ ।”
सरकारले मापदण्ड पालना गर भनेर मात्रै नहुने भन्दै आवश्यक सुविधा पनि दिनुपर्ने आकाश बताउँछन् । अन्य क्षेत्रलाई जस्तै सरकारले चलचित्र क्षेत्रलाई पनि सहजीकरण गर्दै जानुपर्ने उनको भनाइ छ । अब सिफारिस लिएर छायांकनमा जानेलाई सरकारकले प्रोजेक्ट बिमा गरिदिने भएको छ । पीसीआर परीक्षण पनि सरकारले निःशुल्क गरिदिनुपर्छ भन्ने संघले माग गर्दै आएको छ । अन्य मागका सम्बन्धमा पनि छलफल चलिरहेको आकाश बताउँछन् ।
कोरोना संक्रमण सुरु हुँदा गत वर्ष छायांकन भइरहेका केही चलचित्र अहिले छायांकनमा क्रममा छन् । अब जाडो सकिएपछि मात्रै अधिकांश चलचित्र छायांकनमा जाने तयारीमा रहेको संघ बताउँछ ।