आफू सवार गाडीले सडकमा पैदल यात्रुलाई ठक्कर दिएपछि पनि कुनै देशका मन्त्रीले घाइतेको उपचार गराउनुको साटो वास्तै नगरी छाडेर गए । झट्ट सुन्दा यो घटना कतिपयलाई सामान्य लाग्न सक्छ भने अरूका लागि निकै संवेदनशील । प्रचलित कानुन, नैतिकता, मानवीयता र पदीय मर्यादाका दृष्टिले भने यो अत्यन्त गम्भीर घटना हो । नेपाल सरकारका सहरी विकासमन्त्री प्रभु साह चडेको गाडीले सर्लाहीको लालबन्दीमा पैदलयात्रुलाई ठक्कर दिएपछि घटनास्थलबाट भागे । उनको गाडीले ठक्कर दिएपछि घाइते भएका व्यक्ति अस्पतालमा उपचाररत छन् । सर्लाही प्रहरीले मन्त्री साह चडेको गाडीले पैदल यात्रुलाई ठक्कर दिएको पुष्टि गरेको छ । मन्त्री साह रौतहटबाट महोत्तरीतर्फ जाँदै गर्दा उक्त घटना भएको थियो । 

सडकमा अरू नै कारणबाट दुर्घटना भएर कोही घाइते भएको देखे पनि सामान्य मानवीयता भएको व्यक्तिले त्यसै छाडेर हिँड्दैन । त्यसमाथि आफैँ सवार गाडीले पैदल यात्रुलाई धक्का दिएपछि त झन् कानुनतः पनि अलपत्र छाडेर हिँड्न हुँदै हुँदैन । मन्त्री साहले भनेअनुसारै ती व्यक्ति झुक्किएर लडेका भए पनि उनले उपचारको घाइतेको गराएरमात्र बन्दोबस्त मिलाएरमात्र आफ्नो गन्तव्यतर्फ जानु मानवीयता र उनको पदीय मर्यादाअनरूप हुन्थ्यो । तर, सामाजिक सञ्जालमा व्याप्त घटनाको भिडियो हेर्दा मन्त्री साहले ढाँटेको स्पष्टै देखिन्छ । यद्यपि मन्त्री साहले भने सञ्चार माध्यमले घटनालाई अतिरञ्जित बनाएको र प्रहरीले समेत ‘गलत सूचना प्रवाह’ गरेको आरोप लगाएका छन् । घटनाका सम्बन्धमा सामाजिक सञ्जालमा उनले प्रवाह गरेको जानकारीमा मन्त्री साहले भने आफ्नो कमजोरी स्वीकार गर्नुको साटो आफूलाई बदनाम गर्न केही सञ्चार माध्यमले षड्यन्त्र गरेको आक्षेप पनि लगाएका छन् । 

प्रश्न व्यक्तिको संस्कार र वैयक्तिक चरित्रको पनि हो तर प्रभु साह मन्त्री पदमा आसीन पनि भएकाले सार्वजनिक दायित्वको समेत हो । मन्त्री साहको यस व्यवहारले अन्ततः देशकै बदनाम हुन्छ । प्रभु साह उनले दाबी गरेजस्तो घाइतेलाई केही नभएको ठानेर हिँँडेका वा सडकमा भिड जम्मा भएर आफूमाथि आक्रमण गर्ने डरले घटनास्थलबाट भागेका पनि हुनसक्छन् । उनलाई आफूले हालै गुट परिवर्तन गरेका कारण वा आफ्नो हिंसात्मक विगतका कारण पनि बढी डर लागेको हुनसक्छ । तर, यी त नितान्त व्यक्ति प्रभु साहका समस्या हुन् । देशको मन्त्रीलगायत सार्वजनिक पदमा रहेका व्यक्तिले प्रभु साहले गरेजस्तो व्यवहार गर्न कानुनी र नैतिक दुवै आधारमा मिल्दैन । मानवीय दृष्टिबाट त झन् मिल्दैन । यसैले मन्त्री साहले घाइतेको उपचारको व्यवस्था मिलाएर आफ्नो अमानवीय व्यवहारका लागि सार्वजनिक क्षमा याचना गर्नु पदीय मर्यादाअनुरूप हुन्छ । अन्यथा, शक्ति भए कुनै नैतिक, कानुनी र मानवीय मर्यादा पालना नगरे पनि हुने सन्देश पुनः प्रवाहित हुनेछ ।