काठमाडौं । सर्लाहीका रामकिशोर प्रसाद सितापाइलाको पद्म कोलोनीमा बस्छन् । उनको पेशा हो, भ्याट (मूअ कर अर्थात् मूल्य अभिवृद्धि कर) बिल बेच्ने र कोरोबार रकमको ४ प्रतिशतसम्म कमिसन लिने ।

उनलाई सबैले ‘पप्पु भ्याट’ भनेर चिन्ने गरेको राजस्व अनुसन्धान विभागका महानिर्देशक दीर्घराज मैनालीले जानकारी दिए ।

राजस्व अनुसन्धान विभागको सुरूवाती अनुसन्धानबाट उनले विभिन्न व्यापारीलाई जे वस्तु बेचेको बिल चाहिएको सोहीअनुसारको बिल बनाइदिने गरेको खुलेको छ । विभागका महानिर्देशक मैनाली भन्छन्, "अनुसन्धानका क्रममा वास्तवमा कपडा आयात गर्ने तर काटिएको बिलमा काट्ने डन्डी, सिमेन्ट, फोटोकपी कागज, वा जसलाई के चाहिन्छ, सोहीअनुसार बिल बनाउने गरिएको पाइएको छ । यसबाट उनले ३ देखि ४ प्रतिशत कमिसन लिने खुलेको छ ।"

बिल बनाएर बेच्नकै लागि उनले २८ जनाको नाममा  २६ वटा कम्पनी खोलेर भ्याटमा दर्ता गरेको भेटिएको छ । ती सबै कम्पनी मजदुर तथा श्रमिकलाई फकाइफुलाइ गरेर खोलेको मैनालीले जानकारी दिए । 

बाह्रखरीसँग उनले भने, "केही रूपैयाँ दिएर उनीहरूको कागजात लिने, कम्पनी खोल्ने, श्रमिककै नाममा बैंक पनि चलाउने गरेको पाइयो ।"

रामकिशोरलाई चिन्नेले उनलाई पप्पु भ्याट भन्ने अनुसन्धानका क्रममा पनि पाइएको छ । मैनालीले भने, "औपचारिक नाम रामकिशोर प्रसाद रौनियार रहेको भए पनि पप्पु भ्याट भनेर चिनिने गरेको  खुलेको छ । उनको नम्बर कसैले पप्पु भ्याट भनेर सेभ गरेको पाइयो ।"

सितापाइलाको पद्म कोलोनीमा उनको घर छ । सरकारले रामकिशोरको सो घरसमेत सबै सम्पत्ति रोक्का गरेको छ । सम्पत्ति जफत गर्ने प्रयोजनका लागि उनकी श्रीमती सावित्री रौनियारको नाममा रहेको सम्पत्ति पनि रोक्का गरिएको छ ।

रामकिशोरले आफ्नो सम्पत्ति श्रीमतीका नाममा राखेको खुलेको हो । विभागले अनुसन्धानका लागि सम्पत्ति शुद्धीकरण विभागमा पठाउने निर्णयसमेत गरेको छ । रामकिशोर अहिले फरार छन् । उनी यसअघि हिमालयन कार्गो नामक ट्रान्सपोर्ट कम्पनीमा संलग्न थिए । हिमालयनका मालिक बिनोद गुप्ता अहिले राजस्व चुहावटको मुद्दामा जेलमा छन् ।

ती २६ कम्पनीको बिल प्रयोग गरेर कारोबार गर्नहरूबारे पनि विभागले अनुसन्धान गरिरहेको महानिर्देशक मैनालीले जानकारी दिए ।  रामकिशोरसमेत २६ जनाबाट १ अर्ब ३२ करोड ४६ लाख बिगो असुल गरी जरिवाना र कैद सजाय मागदावी लिई विभागले शुक्रबार उच्च अदालत, पाटनमा मुद्दा दायर गरेको छ ।

कमजोर आर्थिक अवस्था भएका मजदुरलगायतका व्यक्तिको नाममा कम्पनी दर्ता गरि सबै फर्मको बैंक खाता सञ्चालन पनि रामकिशोरले नै गर्थे । आव २०७१/७२ देखि २०७४/७५ सम्ममा ती कम्पनीले मूअ कर तथा आयकर राजस्व चुहावट गरेका हुन् । मुअ करतर्फ ४३ करोड ८१ लाख, आयकर तर्फ ८६ करोड ५६ लाख र लाभांश करतर्फ २ करोड ८ लाख चुहावट गरेको राजस्व अनुसन्धान विभागको ठहर छ ।