एजेन्सी । बेलायतमा हाल देखा परेको उच्च संक्रमण संख्या सम्बन्धमा विज्ञहरुले गम्भीर चिन्ता व्यक्त गरेका छन् । अस्पतालमा नयाँ बिरामी लगातार ठूलो स्तरमा बढ्दै गएपछि स्वास्थ्यकर्मीहरु चुनौतीपूर्ण स्थितिमा पुगेका हुन् ।
त्यहाँ अहिले अस्पताल भर्ना हुने बिरामीहरुको संख्या अप्रिलमा पहिलो लहरको संक्रमण फैलँदाभन्दा बढी रहेको छ । शनिबारमात्र लन्डन एम्बुलेन्स सर्भिसलाई सेवाका लागि झन्डै आठ हजार फोन आएको बताइएको छ । जुन पहिलो लहरको संक्रमणजत्तिकै उच्चस्तरमा हो ।
सोमबार त्यहाँ एकैदिन ४० हजार नयाँ संक्रमित थपिएका हुन् भने ३५७ जनाको मृत्यु भएको छ ।
यो तेस्रो लहरको कोरोना संक्रमणलाई नियन्त्रण गर्न हरेक हप्ता २० लाख मानिसलाई सुई लगाउनुपर्ने ‘लन्डन स्कुल अफ हाइजिन एन्ड ट्रपिकल मेडिसिन’ले गरेको अध्ययनले जनाएको छ ।
हालसम्म बेलायतमा कोरोनाभाइरसबाट ७१ हजारभन्दा धेरैको मृत्यु भइसकेको छ । २३ लाख बढी संक्रमित छन् । पर्याप्तस्तरमा खोप वितरण र प्रयोग नभए अस्पताल भर्ना हुनेहरु, आईसीयूमा राख्नुपर्ने बिरामी अनि, कोरोनाका कारण मृत्यु हुनेको संख्या आगामी वर्ष २०२० मा भन्दा धेरै हुने बताइएको छ ।
यसमा पहिलेभन्दा छिटो सर्न सक्ने नयाँ प्रकारको भाइरसका कारण संक्रमण द्रुत गतिमा फैलिरहेको विज्ञहरुको अनुमान छ । जसकारण नै लन्डनसहित दक्षिणपूर्वी क्षेत्रमा कडा नियम लागु गरिएको हो ।
विश्वमा बेलायतबाट आएका यात्रीहरुमा नयाँ प्रकारको भाइरस देखा परेकाले पनि यसविरुद्ध कडा नीति लागु गर्न जरुरी देखिएको छ । ‘इन्डिपेन्डेन्ट सेज ग्रुप’ले यसअघि बेलायतका सबै क्षेत्रमा चौथो तहको कडाइ लागु गर्न सरकारसँग आग्रह गरेको हो । जसमा आवश्यकबाहेकका सबै व्यवसाय, मनोरञ्जनात्मक र सार्वजनिक स्थलहरु बन्द गर्नुपर्ने हुन्छ । त्यस्तै, शिक्षकहरुको युनियनले पनि यसमा समथर्न जनाउँदै स्कुल नखुलाउन सरकारसमक्ष अनुरोध गरेको छ ।
अहिलेको नयाँ रुपान्तरित भाइरस विशेषगरी युवाहरुमा केन्द्रित रहेर फैलिरहेको छ । गत साताको अन्त्यमा त्यहाँ दैनिक संक्रमणदर ३२ हजार नाघेको थियो । जुन त्यसअगाडिका दिनहरुभन्दा ४६.६ प्रतिशत बढी हो ।
अहिले स्वास्थ्य निकायहरुमा अक्सफोर्डको खोप स्वीकृत गराउन दबाब पनि बढिरहेको छ । बेलायतले यसको १० करोड डोज खरिद गर्ने सहमति जनाइसकेको हुँदा देशभर यो खोप छिट्टै खोप उपलब्ध हुन सक्ने र हाल बढिरहेको संक्रमणलाई कम समयमा नियन्त्रण गर्न सकिने अपेक्षा गरिएको छ ।
अघिल्लो महिना अमेरिकी कम्पनी फाइजरको कोरोनाविरुद्धको खोप सर्वसाधारणमा प्रयोगका लागि स्वीकृति दिने बेलायत विश्वकै पहिलो देश बनेको थियो । बिहीबारसम्म त्यहाँका छ लाख मानिसहरुले यसको सुई लगाइसकेको सरकारले जनाएको छ ।
तर, अक्सफोर्ड–एस्ट्राजेनेका खोप देशमै विकसित खोप भएकाले र यसको स्टोरेज पनि तुलनात्मकरुपमा सामान्य भएको हुँदा खोप अभियानमा यसले उल्लेखनीय प्रभाव पार्न सक्ने विश्वास गरिएको छ ।
अहिलेसम्म नयाँ रुपान्तरित कोरोनाभाइरस युरोपेली मुलुकहरुसहित क्यानडा, जापान, सिंगापुर, हङकङ, दक्षिण कोरिया, अष्ट्रेलिया, लेबनन, इजरायल र भारतमा फेला परेको छ ।
भारतमा नयाँ प्रकारको कोरोना्भाइरसबाट छजना संक्रमित भएका हुन् । उनीहरु सबै बेलायतबाटै फर्किएका थिए र आइसोलेसनमा बसिरहेका थिए । अहिले सम्बन्धित निकायले उनीहरुसहित परिवारसँग सम्पर्कमा आएकाहरुको कन्ट्याक्ट ट्रेसिङ सुरु गरिसकेको छ ।