काठमाडौं । विभाजित नेकपाको प्रचण्ड-नेपाल समूहले पूर्वनिर्धारित कार्यक्रमअनुसार प्रधानमन्त्री केपी शर्मा ओलीको संसद् विघटनको कदमविरुद्ध मंगलबार शक्ति प्रदर्शन गर्यो । एक लाख नेता-कार्यकर्ता सडकमा ल्याउने उद्घोष गरेको नेकपाले काठमाडौंका १३ स्थानबाट जुलुस निकालेको थियो ।
जुलुस नाराबाजी गर्दै भृकुटीमण्डपमा कोणसभामा परिणत भयो । प्रचण्ड-नेपाल समूहका दुई अध्यक्ष पुष्पकमल दाहाल प्रचण्ड र माधवकुमार नेपाल पनि प्रदर्शनमा सहभागी बने । प्रदर्शनपछि आयोजित विरोध सभालाई सम्बोधन गर्दै उक्त समूहले केही स्पष्ट सन्देश पनि दिएको छ ।
संसद पुन:स्थापना-अदालतमाथि आशा जनतामा भरोसा
विघटनको सिफारिस गरेको प्रतिनिधिसभा पुन:स्थापना हुनेमा सर्वोच्च अदालत र निर्वाचन आयोगमाथि आशा मात्रै राखेको छ । अदालतमाथि विश्वास भए पनि भरोसा भने जनता र सडकलाई भएको उक्त समूहको ठहर छ । कार्यक्रममा अध्यक्ष नेपालले संसद् पुनर्स्थापना भएरै छाड्ने जिकिर गरे ।
कार्यक्रममा अध्यक्ष माधव नेपालले संसद पुन:स्थापना हुने जिकिर गरे । "प्रतिनिधिसभा पुन:स्थापना हुन्छ, हुन्छ, हुन्छ भएरै छोड्छ,’’ नेपालले भने । प्रचण्डले अदातलमाथि आशा रहेको र भरोसा जनतामाथि नै भएको अभिव्यक्ति दिए ।
"सम्मान गर्ने हो अदालतलाई । सम्मानबाहेक अरु केही गर्न मिल्दैन । हामी गर्दैनौं पनि । हामी आशा गर्छौं, अदालतले छिटोभन्दा छिटो असंवैधानिक र अलोकतान्त्रिक कदम सच्याउनेछ भनेर भरोसा गर्छौं," प्रचण्डले भनेका छन्, "तर हाम्रो सबैभन्दा भरोसा नेपाली जनतामाथि नै हो । अरुमाथि होइन । जनताले मात्रै सच्याउन सक्छन् भन्ने । हाम्रो अन्तिम भरोसा जनतामाथि हो । र हामी आन्दोलन र अभियानमा छौं ।"
नेकपा नाम र सूर्य चिह्न पाउनेमा द्विधा छैन
नेकपामा केपी शर्मा ओली र प्रचण्ड-नेपाल दूवै आफ्नो समूह नै वैधानिक भएको दाबी गरिरहेका छन् । यसको निर्क्योलका लागि निर्वाचन आयोगमा प्रक्रिया पनि अघि बढिसकेको छ । केन्द्रीय कमिटीमा आफूहरुसँग ७० प्रतिशत रहेको भन्दै प्रचण्ड-नेपाल समूह वैधानिकता पाउनेमा आशावादी भए पनि अझै विश्वस्त देखिएको छैन । आजको विरोधसभामा अध्यक्ष नेपालले आफूहरुले वैधानिकता पाउनेमा विश्वस्त हुन आग्रह गरे प्रचण्डले भने रातिराति बैठक हुने गरेको प्रसंग सुनाउँदै जालसाझी हुन सक्ने संकेत पनि गरे ।
"पार्टीको विषय निर्वाचन आयोगमा छ । केन्द्रीय कमिटीको ७० प्रतिशत बढीको बैठक बस्यौं । सशरीर देखाइदिनुपर्यो भनेर निर्वाचन आयोग गयौं । निर्वाचन आयोगका प्रमुख आयुक्त र अन्य आयुक्तहरुसँग हामी यहाँ छ भन्यौं । चाहिन्छ भने तीन सयजना उपस्थित गराउन सक्छौं भनेका छौं,’’ प्रचण्डले बताए ।
उनले आफूहरुसँग घामजत्तिकै छर्लंग ७० प्रतिशत रहेको बताउँदै छलफलै नगरी एकजनाले १२ सय बनाएको केन्द्रीय कमिटीले वैधानिकता नपाउने विश्वास व्यक्त गरे ।
‘निर्वाचन हुँदैन, कांग्रसले सपना नदेखे हुन्छ’
सरकारले घोषणा गरेको चुनाव नहुनेमा प्रचण्ड-नेपाल समूह विश्वस्त देखिन्छ । नेकपाले चुनाव हुने सपना नदेख्न कांग्रेसलाई चुनौती पनि दिएको छ । स्वयं ओलीलाई भरोसा नभएको चुनाव हुने र जितिने भ्रममा नपर्ने सचेत पनि बनाएको छ ।
“कतिपय मानिसहरुलाई कम्युनिस्ट पार्टी विभाजन भएको । मध्यावधि निर्वाचन भइहाल्यो भने जितिहालिन्छ नि भनेर अलिअलि सपना देख्न खोज्या कुरा पनि सुनिन्छ,” अध्यक्ष प्रचण्डले कांग्रेसतर्फ लक्षित गर्दै भने, “म ती साथीहरुलाई त्यस्ता सपना नदेख्न, दुस्वप्न हो भन्ठान्छु । यो हुनेवाला चुनावको घोषणा भएकै होइन । यति तथ्य भन्दाभन्दै पनि भ्रममा पर्यौं भने हामी बर्बाद हुन्छौं, नेपाल बर्बाद हुन्छ ।”
त्यस्तै, उनले संसद् पुन:स्थापनापछि दुई वर्ष चुनाव भई नै हाल्ने, नेकपा फुटिहालेको कारण कांग्रेस ढुक्कै बसे हुने भन्दै उनले कांग्रेसलाई आश्वस्त पार्न खोजे । “संविधान जोगाए चुनाव पनि जित्नुहोला । किन आत्तितनुहुन्छ,” उनले भने ।
वैशाखसम्म मात्रै ओली प्रधानमन्त्री
प्रचण्डले ओली वैशाखसम्म मात्रै प्रधाननमन्त्री रहेने दाबी पनि गरेका छन् । उनले वैशाखपछि ओली प्रधानमन्त्री पनि नरहने र उनी राजनीतिक रुपमा पत्तासाफ हुने बताए ।
"वैशाख उता उनी प्रधानमन्त्री पनि रहँदैनन् । नेपालको राजनीतिक इतिहासबाट उनको पत्तासाफ हुनेवाला छ ।
संसद पुन:स्थापना नभएसम्म सडकमा, आन्दोलन चर्काउने चेतावनी
उनीहरुले संसद् स्थापना नभएपछि सडकबाट नफर्कने उद्घोष पनि गरेका छन् । प्रधानमन्त्री ओलीको कदम नसच्चिँदासम्म सडक संघर्षलाई चर्काउने चेतावनी पनि दिएका छन् । कार्यक्रममा बोल्ने नेताहरुले संसद पुन:स्थापना नहुँदासम्म सडकबाट नफर्कने बताए ।
“यो आन्दोलन होइन । यो त आन्दोलनको ट्रेलर मात्रै हो । यो त भत्कौरो मात्रै हो । जन्ती आउनै बाँकी छ, बाजा बझ्नै बाँकी छ,’’ प्रचण्डले मदन भण्डारीले एक कार्यक्रममा दिएको अभिव्यक्ति स्मरण गर्दै आँधीहुरी आउने चेतावनी दिए । प्रचण्ड-नेपाल समूहले भोलि नै दोस्रो चरणको संघर्षका कार्यक्रम घोषणा गर्ने तयारी पनि गरेको छ ।
ओलीमाथि हमला- ज्ञानेन्द्रको दाँजोमा
प्रचण्ड-नेपाल समूह ओलीमाथि गालीको वर्षा नै गरेको छ । केही समय अघिसम्म एकमुख भएका नेताहरुले विगतका कुराहरुलाई छरपस्टै बनाएका छन् । कार्यक्रममा अध्यक्ष नेपालले ओलीमा पूर्वराजा ज्ञानेन्द्रको प्रवृत्ति भएको टिप्पणी गरे ।
नेताहरुले ओलीमा कम्युनिस्ट प्रवृत्ति नदेखिएको टिप्पणी पनि गरेका छन् । "१२ बजे मलाई बोलाएर भन्नुहुन्छ, अरु कोही काबिल भएनन् माधव कमरेड । तपाईं नै प्रधानमन्त्री हुनुपर्यो र पार्टीको एकल अध्यक्ष हुनुपर्यो । अनि, ४ बजे कमरेड प्रचण्डलाई बोलाएर भन्नुहुन्छ, कोही गतिला मान्छे पाइनँ मैले,’’ तपाईंभन्दा गतिलो छैनन्, नेपालले ओलीप्रवृत्तिबारे भने, "तपाईं एकल अध्यक्ष बन्नुपर्छ, प्रधानमन्त्री पनि बन्नुपर्छ । जब तीनजना हामी भेला हुन्छौं, जम्मै भण्डाफोर हुन्छ । ठीक यही प्रवृत्ति थियो तत्कालीन राजा ज्ञानेन्द्रमा ।"
नेपालले थपे, "मलाई बोलाएर भन्नुहुन्थ्यो, गिरिजाप्रसाद विदेशी दलाल हो, यसले त देश नै खाने भयो । नेपाली कांग्रेस काम नै लाग्दैन । कम्युनिस्टमा देशभक्ति हुन्छ, माधवजी, तपाईंले भूमिका खेल्नुपर्छ । म त्यहाँबाट हिँडेपछि गिरिजाबाबुलाई बोलाएर भन्नुहुन्थ्यो, कम्युनिस्टहरु तानाशाह हुन् । नेपालमा यसको नामेट गर्नुपर्छ । माधव नेपालजस्ताले केही गर्न सक्छ ? गिरिजाबाबु तपाईँ त महान् मान्छे ।"
1628253175.jpg)
