काठमाडौं । त्रिभुवन आर्मी क्लबले एसियाली फुटबल महासंघ (एएफसी)बाट केही दिनअगाडि मात्र एएफसी लाइसेन्स प्राप्त गरेको छ ।
‘ए’ डिभिजन लिग खेलेका १४ टोली सबैले मान्यता लिन पत्रचार गरे पनि केही मापदन्ड पूरा हुन नसक्दा एएफसीले सबैलाई मान्यता दिएन ।
आर्मी क्लबले मान्यता पाएसँगै अब आर्मीले मात्रै एएफसीका प्रतियोगितामा नेपालको प्रतिनिधित्व गर्न पाउने भएको छ ।
कुनै समय दक्षिण एसियामा बलियो मानिने नेपाली फुटबल पछिल्लो समय विभिन्न उतार–चढावले गर्दा लयमा नदेखिनु तितो यथार्थ हो । एएफसीका प्रतियोगितामा बलियो चुनौती दिँदा दर्शकको वाह ! वाह ! बटुल्ने गरेका नेपाली क्लबले पछिल्ला केही संस्करणमा प्रतिनिधित्व गर्न सकेनन् ।
एएफसीले आर्मीलाई मात्र मान्यता दिँदा अरु शीर्ष डिभिजनका क्लबले मापदन्ड पूरा गर्न नसकेको अखिल नेपाल फुटबल संघ (एन्फा)का अध्यक्ष कर्माछिरिङ शेर्पाले स्वीकार गरे ।
आर्मी सहिद स्मारक ‘ए’ डिभिजन लिगको साविक उपविजेता टोली हो ।
आर्मीलाई अन्तर्राष्ट्रियस्तरका क्लबसँग प्रतिस्पर्धा गर्न त्यति सहज भने छैन । त्यसो त विभागीय टोलीमा राष्ट्रिय टोलीको जर्सी पहिरिने खेलाडी पनि छन् । उनीहरुले राष्ट्रिय तथा अन्तर्राष्ट्रियस्तरका केही प्रतियोगितामा अनुभव बटुलिसकेका छन् ।
अरु क्लबलाई भन्दा आर्मीलाई साख जोगाइराख्न वातावरण तुलना गर्दा केही सहज छ । आफ्नै मैदान, खेलाडीले पाउने सेवा र सुविधा आर्मीका लागि थप हौसलाका पाटा हुन् ।
पूर्वाधारको अधिकतम सदुपयोग गर्दै अन्तर्राष्ट्रियस्तरका क्लबलाई टक्कर दिने तयारीमा जुट्न मिहिनेत जरुरी हुन्छ । यसका अलावा आर्मीलाई एएफसीले गरेको विश्वास र फुटबल विकासमा राखेको अपेक्षालाई पूरा गर्न दृढताका साथ लाग्नुको विकल्प छैन ।
फाइल तस्बिर ।