काठमाडौं । केपी ओली समूहप्रति बिहीबार संघर्षको कार्यक्रम घोषणा गरेको नेकपाको प्रचण्ड-नेपाल समूह निकै आक्रामक देखिएको छ । प्रचण्ड-नेपाल समूहले शुक्रबार बिहानैबाट सडकमा प्रदर्शनसँगै दिउँसो पत्रकार सम्मेलन गरेर आफ्नो भँडास पोख्यो ।

केन्द्रीय सदस्य तथा सांसदहरु बिहान साढे ९ बजेअगावै माइतीघरमा भेला भए ।  पूर्वप्रधानमन्त्रीत्रयले ‘हामी यहाँ छौं’ लेखिएको ब्यानर छातीमा टाँसेर सडकमै पलेंटी कसे । माइतीघरमा प्रतिगामी षड्यन्त्र मुर्दावाद, संसद् पुनर्स्थापना गरलगायत नारा लगाउँदै  अध्यक्षद्वय पुष्पकमल दाहाल प्रचण्ड र माधवकुमार नेपाल, वरिष्ठ नेता झलनाथ खनालको नेतृत्वमा  केन्द्रीय सदस्य तथा सांसदहरु निर्वाचन आयोग पुगे ।

आयोगमा पुगेपछि नेताहरुले छिटै आफ्नो पक्षले आधिकारिकता पाउने दाबीसमेत गरे ।  प्रचण्डले आफूहरुको पक्षमा ७० प्रतिशत केन्द्रीय सदस्य रहेको भन्दै छिट्टै निर्णय लिन आग्रह पनि गरे । उनले दुईतिहाइ केन्द्रीय सदस्य स-शरीर उपस्थित गराउन आफू तयार रहेको पनि बताए ।

आयोगमा २९५ केन्द्रीय सदस्यहरुले हस्ताक्षर गरेको निर्णयबारे जानकारी गराएपछि नेताहरुले आफूहरुले स्वत: वैधानिकता पाउने  दाबी गरे । आफूहरुसँग ७० प्रतिशत केन्द्रीय सदस्यहरु रहेको जिकिर गर्दै प्रवक्ता नारायणकाजी श्रेष्ठले भने, “राजनीतिक दलसम्बन्धी कानुनले व्यवस्था गरेअनुसार बहुसंख्यक जहाँ छ त्यो स्वतः वैधानिक हुन्छ । हामीसँग ७० प्रतिशत छ। तैपनि निर्वाचन आयोगले छिट्टै औपचारिक निर्णय गर्छ।’’

ओली गणतन्त्र नेपालमा आउन सक्दैन भनेर फरक विचार राख्‍ने मान्छे
आयोगपछि आज दिउँसो पत्रकार सम्मेलन गरेको प्रचण्ड-नेपाल समूह ओलीप्रति खनियो । पार्टी दुई पक्षमा विभक्त भएपछि ‌औपचारिक रुपमा घटनाक्रमबारे जानकारी दिन आयोजित सम्मेलनमा नेताहरु ‘नोस्टालजिक’ पनि बने । ओली प्रवृत्तिमाथि नेताहरुले रोषप्रकट गर्दै उनीमाथि समय खर्चिए ।

पत्रकार सम्मेलनमा नेता नेपालले ओलीसँग आफूले ४९ वर्षदेखि सहकार्य गरेको सुनाए । उनले ओलीमा अहंकार पैदा भएका कारण पतनको बाटो अघि बढेको बताए । "केपी ओलीसँग ४९ वर्षको सहकार्य, प्रचण्डसँग ३०-३५ वर्षदेखि सहकार्य । फोटो, कुर्सी, पदले मानिसमा अहंकार पैदा गर्छ । विनम्रताबाट उहाँ च्यूत हुनुभयो । उहाँमा अहंकार पैदा भयो । पावरले मान्छेलाई आर्थिक रुपमा भ्रष्ट बनाउँछ या त अहंकारी बनाउँछ,’’ नेता नेपालले भने, "र हाम्रो केपी शर्मा ओली एउटा ज्युँदो जाग्दो उदाहरण हुनुहुन्छ। कम्युनिस्ट विचार, सिद्धान्त,आचरणबाट उहाँ विचलन र पतनको बाटोमा जानुभयो। "

नेपालले केपीवादको चर्चा गर्दै ओली गणतन्त्र र संघीयता विरोधी भएको जिकिरसमेत गरे । "ओलीलाई कम्युनिस्ट आन्दोलन मात्र नभएर गणतन्त्रप्रति अपनत्व बोध छैन । उहाँ साँच्चै गणतन्त्रविरोधी मान्छे हो । गणतन्त्र नेपालमा आउन सक्दैन भनेर फरक विचार राख्‍ने मान्छे हो । गणतन्त्रप्रति उहाँमा कुनै मोह छैन । संघीयताको पनि विरोधी हो । लोकतन्त्रको मूल्य र मान्यताको धज्जी उडाइदिनुभएको छ,’’ नेता नेपालले भने ।

पुस ५ गते इतिहासको कालो दिन
कार्यक्रममा प्रचण्डले पुस ५ गतेलाई कालो दिनको संज्ञा दिए । "जुन दिन त्यो संसद् विघटनको सिफारिस र घोषणा गरियो । त्यो दिन इतिहासमा कालो दिनका रुपमा छ । संघीय लोकतान्त्रिक गण्तन्त्रमाथि क्रूर प्रहार गरिएको छ । त्यो इतिहासको कलंक हो,’’ प्रचण्डले भने ।

आक्रामक रुपमा प्रस्तुत भएका प्रचण्डले ओलीप्रति कटाक्ष गर्दै भने, “बाहिर मीठा कुरा गर्ने भित्र छुरा बोक्नु हुँदोरहेछ । बाहिर भ्रष्टाचार गर्न नि दिन्न भन्नुहुन्छ । तर, भ्रष्टाचार गर्नेलाई संरक्षण गरेर राख्नुभएको छ ।"

ओली त गोमन सर्प रहेनछन्
पत्रकार सम्मेलनमा वरिष्ठ नेता खनाल पनि आक्रामक शैलीमा प्रस्तुत भए । उनले ओलीलाई गोमन सर्पसँग तुलना गरे । उनले ओली मनमा तुष पालेर बस्‍ने नेता भएको बताए । खनालले भने, “ओली गोमन सर्पजस्ता रहेछन्, जहाँ देख्यो त्यही ठुङ्ने ।”

नेता नेपालले ओली समूहलाई रुखको बोक्राको संज्ञासमेत दिए । पार्टी फुट्न संसदीय दलमा ४० प्रतिशत पुर्‍याउनुपर्ने र केन्द्रीय कमिटीमा ४० प्रतिशत पुर्‍याउनु पर्ने व्यवस्था रहेको भन्दै बहुमत आफूहरुसँग भएकाले पार्टी नफुटेको उनको दाबी थियो ।

“कसैले पनि पार्टी फुटाउन सक्दैन । चोइटिने कुरा बेग्लै हो । रुखका पनि बोक्राहरु निस्कन सक्छन् । रुखका बोक्रा निस्किँदा रुख ढलेको भन्न मिल्छ ? बालुटारमा भेला भएको रुखको बोक्रा मात्रै हो,” खनालले भने ।

दुई बाटोमा नेकपा
आन्तरिक कलहले छिन्नभिन्न भएको नेकपाले यतिबेला दुईवटा दिशा पहिल्याएको छ । प्रचण्ड-नेपाल समूह सडक संघर्षमा ओर्लिएको छ भने ओली समूहले निर्वाचन केन्द्रित हुने दाबी गरिरहेको छ । संसद् पुनर्स्थापना र असंवैधानिक कदमविरुद्ध सशक्त आन्दोलनमा जाने उद्घोष प्रचण्ड-नेपाल समूहले गरिसकेको छ। केन्द्रीय कमिटीको बिहीबारको बैठकमा नेपाल बन्द गर्ने अवस्थामा समेत पुग्नुपर्ने बताएका प्रचण्डले आज पहिलो चरणको कार्यक्रमले नपुगे सशक्त आन्दोलन गर्ने चेतावनी दिएका हुन् ।

केन्द्रको बाछिटा प्रदेशमा 
नेकपा विवादको बाछिटा तत्ला तहसम्म विस्तार हुँदै छ । आजै प्रचण्ड-नेपाल समूहले वाग्मती प्रदेशमा मुख्यमन्त्री डोरमणि पौडेलविरुद्ध अविश्वासको प्रस्ताव दर्ता गरेको छ । प्रचण्ड-नेपाल समूहका ४६ जना सांसदहरुको हस्ताक्षरमा पौडेलविरुद्ध अविश्वासको प्रस्ताव दर्ता भएको हो । सो समूहले नेकपा प्रदेश कमिटी इन्चार्ज तथा प्रदेश सांसद अष्टलक्ष्मी शाक्यलाई मुख्यमन्त्रीको नयाँ उमेदवारका रुपमा अघि सारेको छ । आजै प्रचण्ड-नेपाल समूहका तीनजना मन्त्रीहरु शालिकराम जम्मरकट्टेल, अरुण नेपाल र युवराज दुलालले राजीनामा दिएका छन् । अविश्वास प्रस्तावमा शालिकराम जम्मरकटेल प्रस्ताव छन् भने समर्थकमा अरुण नेपाल छन् । 

प्रदेश १ मा पनि अविश्वासको प्रस्ताव लैजाने तयारी भइरहेको चर्चा हुन थालेको छ । उता, विद्यार्थी संगठनमा पनि यसको असर परेको छ । ओली पक्षका अनेरास्ववियूका संयोजक ऐन महरलाई प्रचण्ड-नेपाल समूहका सह-संयोजक रञ्‍जित तामाङले कारबाहीको सिफारिस गरेका छन् ।