काठमाडौं । कोरोना महामारीका कारण स्थगित लिग सुरु गर्न अखिल नेपाल फुटबल संघ (एन्फा) ले चासो देखाएको छ ।

एन्फाले आगामी दिनमा कोभिड-१९ का कारण फुटबल स्थगित नगर्नेसमेत बताएको छ । सहिद स्मारक ‘सी’ डिभिजन लिग आउँदो चैत १ बाट सुरु हुने भएको छ । एन्फाले पदाधिकारीसँग छलफल गर्दै स्थगित लिग सञ्चालनको सहमति जुटाएको हो ।

कोरोनाका कारण गत वर्षको अन्तिममा सुरु गर्ने तयारी गरिएको ‘सी’ डिभिजन लिग स्थगित बनेको थियो । अब कोरोनाका कारण प्रतियोगिता नरोकिने एन्फा अध्यक्ष कर्माछिरिङ शेर्पाले बताए ।

एन्फाले गत वर्ष स्थगित घरेलु फुटबलका प्रतियोगितालाई यथास्थानमा सुचारु गरेर अगाडि बढाउने भएको छ ।

एन्फा ‘सी’ डिभिजन लिगका लागि क्लबको तयारी खर्च बढाउनसमेत सहमत बनेको छ । एन्फाले क्लबका पदाधिकारीलाई फिफा र एएफसीको स्वास्थ्य ‘प्रोटोकल’का विषयमा समेत जानकारी गराएको र सोही मापदण्डलाई पूरा गरेर प्रतियोगिता सुचारु गर्ने लिग निर्देशक सञ्‍जीव मिश्रले बताए ।
फाइल तस्बिर ।