एजेन्सी । केही महिनायता कोरोनाको तेस्रो लहरबाट गुज्रिरहेको दक्षिण कोरियामा संक्रमण दर दिन–प्रतिदिन उच्च बिन्दुमा पुग्न थालेपछि खोपको विषयमा सरकार ठूलो दबाबमा परेको छ ।
यस्तोमा कोरियाले २०२१ को तेस्रो क्वार्टरसम्म एक करोड जनतालाई दुईओटा डोज लगाउन पर्याप्त हुनेगरी फाइजरको खोप भित्र्याउने बताएको छ ।
प्रधानमन्त्री छङ से–क्युनले भनेका छन्, “हामी दोस्रो क्वार्टरमै खोप ल्याइसक्नका लागि आफ्नो पूरै क्षमता लगाइरहेका छौँ । यसमा हामी सहमतिनजिक पुगिसकेका छौँ ।”
उनले फाइजरसँगै अमेरिकाकै अर्को जन्सन एन्ड जन्सनबाट पनि अतिरिक्त खोप मगाएको हुँदा त्यसले ४० देखि ६० लाख मानिसहरुलाई खोप लगाउन पुग्ने बताएका हुन् ।
कोरिया सरकारले यसअघि नै एस्ट्राजेनेकासँग सम्झौता गरिसकेको छ । जसको खोप जनवरीको सुरुआतमै आइसक्ने बताइएको छ भने मोडेर्नासँग पनि दुई करोड डोज प्राप्त गर्नेबारे छलफल भइरहेको छ ।
स्वास्थ्य निकायहरुले सार्वजनिक खोप कार्यक्रम छिटोमा आगामी फेब्रुअरीसम्म सुरु गर्ने र नोभेम्बरमा सम्पन्न गर्ने योजना बनाएका छन् । सरकारले यसअघि नै खोपका लागि भनेर अर्को वर्ष १.२ अर्ब डलरको बजेट छुट्ट्याइसकेको छ ।
संक्रमण तीव्ररुपमा फैलिएसँगै कोरियाले लक्षणबिनाका संक्रमितहरु पहिचान गर्न अहिले प्रतिदिन ५५ हजार मानिसहरुको कोरोना परीक्षण गरिरहेको छ ।
त्यस्तै, सरकारी निकायले नयाँ वर्ष र क्रिसमसको छुट्टीमा चारजनाभन्दा धेरै भेला हुन पनि निषेध गरेको छ । पर्यटकीय स्थलहरुसमेत बन्द गराएको छ ।