काठमाडौं । सिनेमा हल सञ्चालनमा आजबाट आएपछि सरकारले चासो देखाएको छ । बिहीबार सीसीएमसीले सिनेमा हल सञ्चालकलाई बोलाएर छलफल गरेको थियो ।
आज (शुक्रबार) चलचित्र हलहरुको संस्था नेपाल चलचित्र संघलाई जिल्ला प्रशासन कार्यालय काठमाडौंले बोलाएको छ । विहान साढे ११ बजे छलफलका लागि जिल्ला प्रशासन कार्यालयले बोलाएको हो ।
“आज छलफलका लागि सीडीओ कार्यालयले बोलाएको छ । हामी साढे ११ बजे छलफलका लागि जाँदैछौं,” चलचित्र संघका अध्यक्ष मधुसूदन प्रधानले भने, “सीसीएमसीमा पनि हिजो छलफल भएको थियो ।”
छलफल सकारात्मक हुने अपेक्षा संघको रहेको प्रधानले बताए । आफूहरु अगाडि बढिसकेको भन्दै पछि नहट्ने उनको भनाइ छ ।
“हामीले हल खोल्ने निर्णय गरिसक्यौं । आजबाट हल खुलिसके । अब पछि हट्ने कुरै छैन । मल्टिप्लेक्सले अनलाइन टिकट बिक्री सकेका छन्,” उनी भन्छन्, “स्वास्थ्य सुरक्षा मापदण्ड भित्र रहेर सुरक्षित भएर हल खोल्ने हो । डराउनु पर्ने अवस्था छैन ।”
चैत ७ गते बन्द भएका सिनेमा हल नौ महिना पछि आजबाट सञ्चालनमा आएका हुन् ।
अन्य सबै पेशा व्यवसाय सुचारु भइसक्दा सिनेमा क्षेत्रलाई मात्रै खोल्न अनुमति नदिएको चलचित्रकर्मीहरुको गुनासो छ । शैलुन, हेल्थ क्लब तथा ब्युटिपार्लरहरु विना अनुमति खुलिरहे पनि सरकार मौन रहेको भन्दै हल सञ्चालकले हल खोलेका हुन् ।
सरकारले चाहे विना अनुमति हल खोलेको भन्दै संक्रामक रोग ऐनमा टेकेर कारबाही गर्न सक्छ । ऐनमा संक्रामक रोग नियन्त्रणमा बाधा पुर्याएको खण्डमा ६ महिनासम्म कैद वा ६ सय जरिबाना वा दुबै सजाय हुने व्यवस्था छ ।