काठमाडौं । नेपाली कांग्रेसका नेता प्रकाशमान सिंहले विधानअनुसार थपिएको समयावधिभित्रै पार्टीको महाधिवेशन सुनिश्चित गर्नुपर्नेमा जोड दिएका छन् । कांग्रेस केन्द्रीय समितिको आजको बैठकमा धारणा राख्दै उनले कुनै पनि बहानामा महाधिवेशन अनिश्चित हुने बाटोमा जान नहुने बताए ।
असामान्य अवस्थामा थप गर्ने व्यवस्थाअनुसार चार वर्षमा गर्नुपर्ने महाधिवेशन थप गरिएको एक वर्षमा पनि कार्यतालिकाअनुसार काम नभएकोमा उनको असन्तुष्टि थियो । देशमा संविधानविपरीत भएको संसद् विघटनको विरोध गर्दै-गर्दा पार्टी विधानअनुसार चलाउनुपर्नेमा पनि ध्यान दिनुपर्ने उनको भनाइ थियो ।
‘‘असंवैधानिक रूपमा सरकारले संसद् विघटन गरेको छ । संसद् पुन:स्थापनासँगै कांग्रेसको महाधिवेशन पनि सुनिश्चित गर्नुपर्छ,’’ उनले बैठकमा भने । नेता सिंहले सरकारविरुद्धको आन्दोलन कांग्रेसकै अगुवाइमा गर्नुपर्ने धारणा राखेका थिए ।
-फाइल तस्बिर