काठमाडौं । प्रचण्ड–नेपाल समूहले प्रधानमन्त्री केपी शर्मा ओलीलाई आफूले आधिकारिक जिकिर गर्दैै आएको नेकपाको साधारण सदस्यबाट अझै केही दिन नहटाउने भएका छन् ।
पुस ७ गते बसेको केन्द्रीय कमिटी बैठकले पार्टी अध्यक्षबाट हटाउने स्थायी कमिटी बैठकको निर्णय अनुमोदन गरे पनि उनी अझै सचिवालय, स्थायी र केन्द्रीय कमिटीमा बहाल रहेको बताइएको छ । केन्द्रीय कमिटी बैठकको निर्णय सुनाउँदै अध्यक्ष पुष्पकमल दाहाल प्रचण्डले संसद् विघटनको सिफारिस गर्ने निर्णय गल्ती थियो भनेर आत्मालोचित भए अझै स्वीकार गर्न सकिने बताएका थिए ।
दाहाल–नेपाल समूहका सचिवालय सदस्यले ओलीलाई अझै केहीदिन थप कारबाही नगरिने बताएका हुन् । “उनलाई गल्तीअनुसार थप कारबाही त गर्नैपर्छ तर अहिले नै त्यसबारे छलफल भएको छैन,” एक सदस्यले भने ।
पुस ७ गते ओली र प्रचण्डले छुट्टाछुट्टै केन्द्रीय कमिटीको बैठक राखेर आफूलाई आधिकारिक, वैधानिक जिकिर गरेका छन् । नेकपाको आधिकारिकता विवाद निर्वाचन आयोग पुगेको छ । ओली पक्षले केन्द्रीय कमिटी विस्तार र विधान संशोधन गरेको निर्णय निर्वाचन आयोग पुर्याइसकेको छ ।
प्रचण्ड–नेपाल समूहले बुधबार स्थायी कमिटी सदस्य सुरेन्द्र पाण्डे, लिलामणि पोखरेल, केन्द्रीय सदस्य राजेन्द्र पाण्डे र पूर्वमहान्यायाधीवक्ता मुक्ति प्रधान सहितको प्रतिनिधिमण्डललाई निर्वाचन आयोग पठाएर आफ्नो समूहको निर्णयको जानकारी गराइसकेको छ ।
पार्टीका वरिष्ठ नेता झलनाथ खनालले पनि बुधबार नै संघीय संसदीय दलको बैठकमा पनि सांसदहरूलाई केन्द्रीय कमिटीले गरेको निर्णयको जानकारी गराइएको बताए । आजै बसेको संसदीय दलको बैठकले प्रचण्डलाई संसदीय दलको नेता बनाउने माधव नेपालको प्रस्ताव अनुमोदन गरेको खनालको भनाइ थियो ।
प्रचण्डले ४० पृष्ठ लामो प्रत्युत्तर पत्र पेस गर्दै
दाहाल–नेपाल समूहको केन्द्रीय कमिटीको बैठक बिहीबार पनि बस्दैछ । कार्की पार्टी प्यालेसमा बस्ने केन्द्रीय कमिटीको बैठकमा ओलीले स्थायी कमिटीमा पेस भएका दस्तावेजका अतिरिक्त ४० पेज लामो अर्को प्रत्युत्तरपत्र पेस गर्ने उनका प्रेस संयोजक विष्णु सापकोटा जुगलले जानकारी दिए ।
गत कात्तिक २२ सचिवालयको बैठक बोलाउन सहमतिको माग गर्दा २५ गते ओलीले पाँच पृष्ठ लामो जवाफ लेखेका थिए । त्यसपछि नेकपामा आरोप–प्रत्यारोपको सिलसिला नै चलेको थियो । कात्तिक २८ गते बसेको सचिवालय बैठकमा प्रचण्डले पुनः त्यसको जवाफ दिँदै अर्को पत्र लेखेका थिए । १३ मङ्सिरमा ओलीले १९ पानामा त्यसको प्रत्युत्तर लेखेपछि पत्रको सिलसिला रोकिएको थियो ।
पार्टी विभक्त भएपछि ओलीलाई प्रचण्डले ४० पानामा त्यसको जवाफ दिन लागेको उनीनिकट स्रोत बताउँछ । “सचिवालय बैठकमा उहाँले मौखिकरूपमा जवाफ दिनुभएको छ । केन्द्रीय कमिटी बैठकमा लिखित नै जाओस् भनेर त्यसको तयारी गरिएको हो,” उनीनिकट स्रोतले भन्यो ।
दाहाल–नेपाल समूहमा नयाँ महासचिवको खोजी
पार्टीका महासचिव विष्णु पौडेल ओली खेमातिर लागेपछि दाहाल–नेपाल समूहमा महासचिव पद रिक्त छ । उनीहरूले नयाँ महासचिवको खोजी गरेको र बिहीबार नै पूर्तिको तयारी गरेको स्रोत बताउँछ । स्रोतका अनुसार महासचिवको छनोटमा झलनाथ खनाल हाबी भएका छन् । मङ्गलबारको स्थायी कमिटीमा खनालले ओलीलाई कारबाही गरेपछि रिक्त रहेको पार्टी अध्यक्षमा माधव नेपाललाई प्रस्ताव गरेका थिए ।
स्थायी कमिटीले अनुमोदन गरेपछि केन्द्रीय कमिटीको बैठकमा पनि उनैले प्रस्ताव गरे । ३ सय १५ जना केन्द्रीय सदस्य उपस्थित रहेको जिकिर गरिएको बैठकमा प्रभु साहबाहेक विरोध गर्ने कोही भएनन् ।
नेता नेपाललाई पार्टी अध्यक्षमा प्रस्ताव गरेका महासचिव आफूले भनेकै मानिसलाई बनाउनुपर्ने खनालको तर्क छ । उनले तत्कालीन एमालेको नवौँ महाधिवेशनमा झीनो मतान्तरले ईश्वर पोखरेलसँग पराजित हुन पुगेका सुरेन्द्र पाण्डेलाई प्रस्ताव गरेका छन् ।
पार्टी अध्यक्ष पुष्पकमल दाहाल प्रचण्डले जनार्दन शर्मालाई अघि सारेका छन् । शर्माको विकल्पमा उनले वर्षमान पुन अनन्तलाई पनि अघि सारेको स्रोतको दाबी छ । यता माधव नेपालले भने भीम रावललाई अगाडि बढाउने तयारी गरेका छन् । रावलबाहेक उनको चाहनामा बेदुराम भुसाल पनि छन् ।
तर, अन्तिममा पाण्डेकै सम्भावना बलियो रहेको स्रोत बताउँछ ।