काठमाडौं । नेपाल खेलकुद पत्रकार मञ्चले हरेक वर्ष आयोजना गर्दै आएको नेपाली खेलकुद क्षेत्रको प्रतिष्ठित अवार्ड ‘एनएसजेएफ पल्सर स्पोर्ट्स अवार्ड २०७६’ को सह-प्रायोजकमा डिश मिडिया नेटवर्क जोडिएको छ ।
१७औं संस्करणमा आयोजना हुने पल्सर स्पोर्टस् अवार्डका लागि मुख्य सह-प्रायोजकका रुपमा डिश मिडिया नेटवर्क जोडिएको छ । स्पोर्टस् अवार्ड कार्यक्रमका लागि डिश मिडियाले मञ्चलाई नगद तथा जिन्सी गरी ११ लाख रुपैयाँबराबरको सह-प्रायोजन गर्नेछ ।
सम्झौतामा नेपाल खेलकुद पत्रकार मञ्चका सहासचिव प्रज्वल वली र डिस मिडिया नेटवर्कका सीईओ सुदीप आचार्यले सम्झौतापत्रमा हस्ताक्षर गरेका हुन् । डिश मिडियाले अवार्ड विजेताहरुलाई डिशहोमको १३ थान कनेक्सन (दुई वर्षको रिचार्जसहित), २० मनोनीतलाई २० थान डिशहोम कनेक्सन (एक वर्षको रिचार्जसहित) र १३ थान सेटटप बक्स (दुई वर्षको रिचार्जसहित) उपलब्ध गराउनेछ ।
दुई संस्थाबीचको सम्झौता एक वर्षसम्मको हुनेछ । ‘पल्सर स्पोर्टस् अवार्ड’ यही पुस २८ गते हुँदै छ । अवार्डका लागि पिपल्स च्वाईस अवार्डको मनोनयन पनि सार्वजनिक भइसकेको छ ।
यसपल्ट उक्त विधामा पौडीकी गौरिका सिंह, भलिबलकी अरुणा शाही, बास्केटबलकी सदिना श्रेष्ठ, फुटबलकी सावित्रा भण्डारी र करातेका मण्डेकाजी श्रेष्ठ मनोनयनमा परेका छन् ।
