काठमाडौं । स्पेनिस ला लिगा फुटबल अन्तर्गत आज (बुधबार) साविकको विजेता टोली रियल मड्रिडले ग्रानाडासँग प्रतिस्पर्धा गर्दैछ । रियलको घरेलु मैदानमा हुने दुई टोलीबीचको खेल नेपाली समय अनुसार राति १२ः३० मा सुरु हुनेछ । 

आजको खेलमा जित निकाल्दै रियललाई शीर्ष स्थानको एट्लेटिको मड्रिडसँग अंक बराबरी गर्ने मौका छ । लिगमा १४ खेल खेलेको रियल २९ अंकसहित तालिकाको दोस्रो स्थानमा छ । 

शीर्ष स्थानमा रहेको एट्लेटिकोको ३२ अंक रहेको छ । अजाको खेलमा जित निकाल्न सकेमा रियल आफूलाई अंक तालिकामा बलियो बनाउने छ । रियलका लागि इडेन हजार्ड मैदान उत्रने भएका छन् । 

घाइते भएका कारण केही समय मैदान बाहिर रहेका हजार्ड मैदान फर्कन लागेका हुन् । यता ग्रानाडा पनि आजको खेलमा जित निकाल्दै आफूलाई अंक तालिकाको पाँचौ स्थानमा उकास्ने योजनामा छ । 

लिगमा १३ खेल खेलेको ग्रानाडा २१ अंकसहित तालिकाको सातौं स्थानमा छ । पाँचौ स्थानमा रहेको बार्सिलोनाको २४ अंक छ ।