एजेन्सी । कोरोनाभाइरस अन्टार्कटिकामा पनि पुगेको छ । जुन यसअघि कोभिडमुक्त एकमात्र महादेश थियो ।
चिलीको सैन्य विभागले यसबारे जानकारी गराएको हो । सैनिकहरुले यतिबेला त्यहाँको रिसर्च स्टेसनमा कार्यरत् स्टाफहरुलाई क्वारेन्टिन गर्ने व्यवस्था मिलाइरहेको बताएको छ ।
खबरका अनुसार ‘बनार्दो ओहिगिन्स’ बेसमा अहिले ३६ जना मानिसहरु कोरोनाबाट संक्रमित भएका छन् । जसमा २६ सैनिक र १० जना बेसको मेन्टेनेन्स सञ्चालन गरिरहेका ‘कन्ट्राक्टर’हरु रहेका छन् ।
स्थायीरुपमा स्थापित रिसर्च स्टेसनलाई चिलीको सेनाले सञ्चालन गर्दै आएको छ । जुन अन्टार्कटिकाको सबैभन्दा उत्तरी भूभागमा पर्दछ ।
बेसका कर्मचारीहरु पहिले नै राम्ररी आइसोलेट अवस्थामा रहेको र निरन्तर स्वास्थ्यकर्मीहरुको निगरानीमा भएकाले अहिलेसम्म कुनै जटिल समस्या नआएको बताइएको छ ।
विश्वकै सबैभन्दा एकान्त ठाउँमा पर्ने अन्टार्कटिकाको रिसर्च एवम् सैन्य स्टेसनले पछिल्ला केही महिना भाइरसलाई आउन नदिन अधिकतम सावधानी अपनाएको थियो ।
भाइरस भित्रिन नदिन पर्यटकीय यात्राहरु रद्द गरिएको थियो भने बाहिरी गतिविधि पनि कम गरी स्टाफहरुलाई सीमित गराउनुका साथै भवनहरु बन्द गरिएको थियो ।
ब्रिटिस अन्टार्कटिक सेर्भेसँग कार्यरत् अनुसन्धानकर्ताहरुको अनुमानमा यस महादेशभर स्थापित ३८ स्टेसनका झन्डै एक हजार मानिसहरुलाई दक्षिणतर्फबाट एकदमै सुरक्षित तरिकाले कुनै घटनाबिना यात्रा गराइएको थियो ।
तर, गर्मीयामको सुरुआतमा त्यहाँबाट आवतजावत गरिरहँदा त्यसले संक्रमणको जोखिम उच्च बनाइदिएको बताइएको छ । यस्तोमा दुईजना सैनिकहरु बिरामी परेपछि नै डिसेम्बरको मध्यमा पहिलो कोभिड–१९ संक्रमित फेला परेका हुन् ।
अन्टार्कटिकाबाट सबैभन्दा नजिकमा रहेको बस्ती मेगेलेन्स क्षेत्र, जुन चिलीमा कोरोनाबाट अत्यन्तै नराम्ररी प्रभावित हुने ठाउँमा पर्दछ । सो क्षेत्र महिनौँदेखि क्वारेन्टिनमै छ ।
यसअघि, चिलीको नौसेनाले अन्टार्कटिका क्षेत्रतर्फ जाँदै गर्दा नोभेम्बर २७ र डिसेम्बर १० का बीच २०८ चालकदलमध्ये तीनजनामा कोभिड–१९ देखा परेको रिपोर्ट गरेको थियो । रोयटर्सबाट ।