काठमाडौं । नेकपा (क्रान्तिकारी–माओवादी)का वरिष्ठ नेता सीपी गजुरेलले अब आफूहरुले जनगणतन्त्र स्थापनाको लागि लडाइँ लड्ने उद्घोष गरेका छन् ।
संसद् विघटन प्रतिगामी कदम भए पनि आफूहरु त्यसको पुनःस्थापनाको पक्षमा नरहेको उनले प्रष्ट पारे ।
मंगलबार राजधानीमा आयोजित एक कार्यक्रममा उनले संसदीय व्यवस्था देशका निम्ति अभिसाप भएको जिकिर गरे ।
नेपाली भूमिमा बारम्बार हुने आन्दोलनका उपलब्धिहरु खेर जानु र पुनः देश अस्थिरतामा जानुको मूल कारण नै संसदीय व्यवस्था रहेको २३ दलीय मोर्चाको नेतृत्वकर्तासमेत रहेका गजुरेलको तर्क छ ।
‘‘यो व्यवस्थाकै खारेजमा जानु उचित छ,”उनले भने ।
प्रधानमन्त्री केपी शर्मा ओलीले आफू सत्ता र शक्तिमा रहनका निम्ति संकटकालको समेत तयारी गरेको उनको दाबी छ ।
‘तपाइँहरु अर्को आन्दोलन या संघर्ष भन्दै हुनुहुन्छ, जनताले किन लड्ने ?’ भन्ने पत्रकारको प्रश्नमा उनले भने, “हो हामी पनि त्यही भनिरहेका छौँ । बारम्बार घुमिफिरी संसदीय व्यवस्थाको निम्ति होइन, अन्तिम लडाइँ यो वर्तमान व्यवस्था र जनगणतन्त्रका लागि लडौँ भन्ने हो ।”
गजुरेलले थपे, ‘‘अहिले ओली असफल भन्ने गरिन्छ । तर, उनीमात्रै होइन, सिंगो लोकतान्त्रिक गणतन्त्र फेल भएको हो । संसदीय व्यवस्थाभित्र देशी–विदेशी शक्तिहरुले खेल्ने र जनविरोधी दलालहरु मोटाउने र पोसिने रक्षाकवज हुन्छ । त्यसको एकमात्र स्थायी निकास जनगणतन्त्र हो ।’’
गजुरेलले आफ्नो पार्टीसहितको २३ दलीय मोर्चाले छिट्टै संघर्षका कार्यक्रम सार्वजनिक गर्ने जानकारी दिए ।
