काठमाडौं । फागुनमा हुने भनिएको नेपाल इन्टरनेसनल फिल्म फेस्टिभल (निफ)को चौथो संस्करण स्थगित भएको छ । फागुनको १२ देखि १६ सम्म काठमाडौंमा आयोजना हुने भनिए पनि फेस्टिभल कोरोनाका कारण निर्धारित मितिमा हुन नसक्ने आयोजकले जनाएको छ । 

आयोजक संस्था नेपाल चलचित्र तथा साँस्कृतिक प्रतिष्ठानका अनुसार फेस्टिभल अब २०७८ वैशाखको २३ देखि २७ सम्म काठमाडौंमा आयोजना हुने छ । 

आयोजकले पूर्व निर्धारित मितिमा फेस्टिभल गर्ने गरी विश्वभरका फिल्म मेकरबाट फेस्टिभलमा सहभागिताका लागि आवेदन पनि खुला गरेको थियो । तोकिएको समयावधिमा ५२ देशका ४ सय बढी फिल्मले सहभागगिताका लागि आवेदन दिएका थिए । 

आयोजक संस्थाका अध्यक्ष केपी पाठकका अनुसार प्राप्त फिल्म मध्येबाट छानिएका फिल्मको सूचि फागुन ८ मा सार्वजनिक गरिने छ ।