काठमाडौं । प्रिमियर लिग फुटबलमा लेस्टर सिटीले जित निकालेको छ । आइतबार भएको खेलमा लेस्टरले टोटेनहमलाई हराउँदै आफूलाई शीर्ष दुईमा स्थापित गर्न सफल भएको हो ।  टोटेनहमको घरेलु मैदानमा भएको खेलमा लेस्टरलाई जित दिलाउन जिम्मी भार्डिले एक गोल गरे । एक गोल लेस्टरले आत्मघाती गोल उपहार पाएको हो । 

खेलको पहिलो हाफको इन्ज्यूरी समयमा लेस्टरका लागि भार्डीले गोल गर्दैै टिमलाई अग्रता दिलाएका हुन् । पहिलो हाफमा १–० गोलको अग्रता लिएको लेस्टरले दोस्रो हाफमा थप एक गोल गर्न सफल भएको थियो ।  खेलको ५९ औं मिनेटमा टोटेनहमका टोबीले आत्मघाती गोल गर्दा लेस्टरले २–० गोलको जित निकाल्न सफल भएको हो । जितसँगै लेस्टर अंक तालिकाको दोस्रो स्थानमा उक्लन सफल भएको छ । 

लिगमा १४ खेल खेलेको लेस्टरले २७ अंक जोडेको छ । यता पराजित टोटेनहम भने २५ अंक जोड्दै तालिकाको पाँचौ स्थानमा झरेको छ ।