काठमाडौं । इटालियन सिरी ए फुटबलमा युभेन्ट्सले सहज जित निकालेको छ । शनिबार राति भएको खेलमा युभेन्ट्सले जित निकाल्दै अपराजित यात्रालाई कायम राखेको हो ।
युभेन्ट्सले पार्माविरुद्ध ४-० को जित निकाल्न सफल भएको हो । पार्माको घरेलु मैदानमा भएको खेलमा युभेन्ट्सलाई जित दिलाउन क्रिस्टियानो रोनाल्डोले दुई गोल गरे । त्यस्तै अल्भारो मोराटा र डिजन कुलुस्वेस्कीले एक-एक गोल गरे ।
डेजान कुलेसेभस्कीले खेलको २३औं मिनेटमा गोल गर्दै टिमलाई अग्रता दिलाए । २६औं मिनेटमा रोनाल्डोले गोल गर्दै टिमको अग्रतालाई दोब्बर पारे ।
खेलको ४८औं मिनेटमा रोनाल्डोले व्यक्तिगत दोस्रो गोल गर्दै टिमको अग्रतालाई ३-० गोलको अग्रता दिलाए । खेलको ८५औं मिनेटमा अल्भारो मोराटाले गोल गर्दै टिमलाई ४-० गोलको जित दिलाए ।
जितसँगै युभेन्ट्सले लिगमा १३ खेलबाट २७ अंक जोडेको छ । युभेन्ट्स लिगको तेस्रो स्थानमा छ । पराजित पार्मा १२ अंकसँगै १५औं स्थानमा छ ।