काठमाडौं । नेपाल क्रिकेट संघ (क्यान)का अध्यक्ष चतुरबहादुर चन्दले कोभिड–१९ का कारण रोकिएको क्रिकेट खेलले विस्तारै गति लिने बताएका छन् ।
लामो समयदेखि क्रिकेटको कुनै पनि खेल हुनसकेको छैन । अब भने क्यानले नेपाल प्रिमियर लिग (एनपीएल)सहित विभिन्न घरेलु खेलहरुको आयोजना छिट्टै गर्न लागेको उनले बताए ।
शनिबार धनगढीमा पत्रकारहरूसँग कुराकानी गर्दै अध्यक्ष चन्दले नेपालको क्रिकेटलाई विश्वस्तरीय बनाउन धेरै सुधार गर्नुपर्ने उल्लेख गरे । क्यानले त्यसतर्फ ध्यान दिएको उनको भनाइ छ ।
विश्वभर चर्चा पाउने गरी एनपीएल आयोजना गरिने उनले बताए ।
नेपाली राष्ट्रिय क्रिकेट टोलीको मुख्य प्रशिक्षकमा नियुक्त डेभ वाटमोरको कारण क्रिकेट विकासमा टेवा पुग्ने चन्दको विश्वास छ ।
क्यानलाई पारदर्शी बनाउने र विभिन्न उमेर समूहका खेलाडीहरूको छनोट गर्दा उनीहरूको क्षमतालाई मुख्य प्राथमिकता दिनेसमेत उनले बताउनुभयो ।
निजीस्तरमा सञ्चालन भइरहेका लिगहरूलाई पनि कानुनी दायरामा ल्याउने उनले प्रस्ट पारे ।
सरकारले क्रिकेट विकासमा ध्यान नदिँदा नेपाली क्रिकेटले लक्ष्यअनुसार फड्को मार्न नसकेको उनको भनाइ छ ।
फाइल तस्बिरः फेसबुकबाट ।