काठमाडौं । कोरोना भाइरसको महामारीका कारण नेपाली खेल क्षेत्र लामो समयसम्म ठप्प भयो । एकाध खेलका प्रशिक्षण केही समय भए पनि राष्ट्रिय क्रिकेट टोली करिब नौ महिनापछि मैदान फर्कियो । नेपाली क्रिकेट नौ महिनापछि मैदान फर्कंदा टोलीका खेलाडीहरुका लागि भने नतिजा सकारात्मक रह्यो । खेलाडीहरुले लकडाउनको अवधिमा आफूलाई सेल्फ प्रशिक्षणमा व्यस्त बनाए ।
त्यही प्रशिक्षणको नतिजा केही खेलाडीलाई खेल प्रदर्शनका हिसाबले सफल बन्यो । नेपाली खेलाडीहरु करिब ९ महिनापछि गौतम बुद्ध अन्तर्राष्ट्रिय क्रिकेट मैदानमै रहेको नमुना मैदानमा त्रिकोणात्मक सिरिज खेले । सिरिजमा नेपाली खेलाडीहरुको प्रदर्शन सम्झनलायक पनि बन्यो । उनीहरुको प्रदर्शन नौ महिनाअघिको भन्दा पनि राम्रो देखियो । त्यसमध्येका एक खेलाडी हुन् नेपाली राष्ट्रिय टोलीका बलर अविनाश बोहोरा ।
अविनाश गौतम बुद्ध कप क्रिकेटको त्रिकोणात्मक सिरिजअन्तर्गत दुई खेलमा ‘प्लेअर अफ दी म्याच’ चुनिए । उनी सिरिजको ‘प्लेअर अफ दी सिरिज पनि चुनिए’ नौ महिनापछि मैदान फर्कंदा जस्तो खालको अपेक्षा अरुले उनीबाट लिएका थिए उनको प्रदर्शन त्योभन्दा पनि राम्रो भयो । प्रतियोगिताको पहिलो खेलमा अविनाशले वाग्मतीविरुद्ध दुई विकेट लिन सफल भएका थिए । उक्त खेलमा राप्ती हारनजिक भएको अवस्थामा अविनाशले एकै ओभरमा दुई विकेट लिँदा राप्तीले जित निकाल्न सफल भएको थियो ।
टिमलाई जित दिलाउन महत्त्वपूर्ण भूमिका खेलेका अविनाश उक्त खेलमा ‘प्लेअर अफ दी म्याच’ पनि चुनिए । पहिलो खेलमै सफलता हात पर्दा अविनाशको खेल्ने लय झनै उच्च बन्दै गयो । नारायणीविरुद्धको दोस्रो खेलमा अविनाशले तीन विकेट लिन सफल भए । सफल बलरका रुपमा रहेका अविनाशले दोस्रो खेलमा पनि आफूलाई उत्कृष्ट साबित गरे । उक्त खेलमा राप्तीले नारायणीविरुद्ध सहज जित हात पार्न सफल भयो ।
अविनाशले फाइनल खेलमा पनि आफ्नो जादुमय प्रदर्शनलाई कायम राखे । उनले नारायणीविरुद्धको फाइनल खेलमा तीन विकेट लिन सफल भए । उनी फाइनल खेलमा पनि ‘प्लेअर आफ दी म्याच’ चुनिए । अविनाशले प्रतियोगिताका तीन खेलमा आठ विकेट हात पारे । उनी ‘प्लेअर अफ दी सिरिज’ पनि चुनिए । लकडाउनको समय आफूले गरेको सेल्फ प्रशिक्षणले पनि प्रतियोगितामा उत्कृष्ट प्रदर्शन गर्न सहज भएको बताए ।
“लकडाउनमा मैले गरेको सेल्फ प्रशिक्षणले सिरिजमा खेल्ने राम्रो माहोल बनायो । बन्द प्रशिक्षणको केही दिन पनि राम्रो भएको थियो । समग्रमा मेरा लागि यो सिरिज सफल भयो । यसले गर्दा अब आउने खेलमा मलाई झनै राम्रो खेल्ने ऊर्जा दिलाउँछ,” अविनाशले बाह्रखरीसँगको कुराकानीमा भने ।
अविनाश हाल राष्ट्रिय टोलीको बन्द प्रशिक्षणमा छन् । उनी राष्ट्रिय टोलीका लागि पनि आगामी खेलमा उत्कृष्ट प्रदर्शन गर्ने योजनामा छन् । घरेलु प्रतियोगितामा आफूलाई अब्बल बनाएका अविनाश राष्ट्रिय टोलीमा पनि बेग्लै पहिचान बनाउन सफल छन् ।