काठमाडौं । सरकारले सिनेमा हल खोल्ने निर्णय नगरे पनि पुस १० गतेबाट सिनेमा हल खोल्ने पूर्व निर्णयबाट आफूहरु पछि नहट्ने चलचित्र संघले जनाएको छ । अधिकांश पेसा तथा व्यवसाय खुलिसक्दा पनि सिनेमा हल खोल्ने अनुमति नदिएको भन्दै नेपाल चलचित्र संघले पुस १० गतेबाट सिनेमा हल खोल्ने घोषणा गरिसकेको छ ।
“हामी अब कुनै पनि हालतमा आफ्नो निर्णयबाट पछि हट्दैनौं । हामीले पूर्व मेचीदेखि पश्चिम महाकालीसम्मका हल खोल्न सर्कुलर गरिसक्यौं,” चलचित्र संघका अध्यक्ष मधुसूदन प्रधान भन्छन्, “हामीले घर बसेका स्टाफ बोलाइसक्यौं । बुधबारबाट सफाइ पनि सुरु गरिसक्यौं । सर्भर र सफ्टवेयर सञ्चालनका लागि तयारी भइसक्यो । अब पछि हट्ने कुरै छैन ।”
सिनेमा प्रदर्शनका लागि वितरकहरुसँग पनि कुरा भइसकेको उनको भनाइ छ ।
“पार्टी प्यालेस, जिम खाना, ब्युटी पार्लर, सैलुनहरु खुलिसके तर सरकारले निर्णय गरेको छैन । तैं चुप मैं चुप गरेर आफ्नो व्यवसाय सञ्चालन गरिरहेका छन्,” अध्यक्ष प्रधान भन्छन्, “हामीले हाम्रो गन्तव्य तय गरिसक्यौं । जसरी हुन्छ १० गते हल खोल्ने हो । गिरफ्तारी दिनु परे पनि दिने हो । पक्रिएर लैजान्छ भने ठीक छ, जेल बस्ने हो ।”
पर्याप्त सुरक्षा सावधानी अपनाएर ५० प्रतिशत अकुपेन्सीमा सिनेमा हल खोल्छुभन्दा पनि नदिनु चलचित्रकर्मीमाथिको अन्यायको पराकाष्ठा भएको उनको बुझाइ छ ।
“भारतमा सिनेमा हल खुलेपछि कोरोना संक्रणको जोखिम कति छ भनेर गरेको अध्ययनले अन्य क्षेत्रभन्दा सुरक्षित रहेको निष्कर्ष आएको मैले पढेको छु । भलै त्यो आधिकारिक डकुमेन्ट मसँग छैन,” उनी भन्छन्, “तर यहाँ आजसम्म नखोलिएको क्षेत्र यही मात्रै हो । सुपर मार्केटमा पाइला टेक्ने ठाउँ छैन । बजारमा भिड छ । हामी त डाक्टर राख्छौं । डिसइन्फेक्ट गर्छौं । मास्क र स्यानिटाइजरको व्यवस्था गर्छौं । एकपटकमा १० जना मात्रै प्रवेश गराएर उनीहरुलाई सिटमा बसाएर मात्रै अरुलाई प्रवेश गराउँछौं । त्यस्तै पर्यो भने एक सो मात्रै चलाउँछौं ।”
तत्काललाई पैसा कमाउनेभन्दा पनि ‘वार्म अप’का लागि मात्रै हल चलाउन लागेको उनले स्पष्ट पारे । सिनेमा हलमा संक्रमणको त्रास छैन भन्ने प्रमाणित भएपछि मात्रै पहिलाकै अवस्थामा हल चलाउने उनको भनाइ छ ।
सुरुमा चैतको पहिलो साता सिनेमा हल बन्द हुँदा हलमा चलिरहेका सिनेमा प्रदर्शन गर्ने विषयमा छलफल चलिरहेको अध्यक्ष प्रधानको भनाइ छ । उक्त समय नेपाली चलचित्र ‘आमा’ र ‘सेन्टी भाइरस’ प्रदर्शनरत थिए । यसका अलावा चलचित्र विकास बोर्डले डिजिटलाइज गरेका पुराना क्लासिक सिनेमाहरु देखाउनेबारे सल्लाह भइरहेको पनि उनले जानकारी दिए ।
देशभरका करिब २०० सिनेमा हल बन्द हुँदा हालसम्म दुई अर्बभन्दा धेरै रकम हलहरुले मात्रै घाटा बेहोर्नुपरिरहेको उनको दाबी छ ।
चलचित्र कलाकार संघका अध्यक्ष रवीन्द्र खड्का १० गतेसम्म हल खोल्ने निर्णय सरकारबाट नभए झडपको अवस्था आउन सक्नेभन्दै यसतर्फ दुवै पक्ष सचेत हुनुपर्नेमा जोड दिन्छन् । उनी सरकारले चलचित्रकर्मीलाई अन्याय गरेको जस्तो र चलचित्रकर्मीहरुले पनि सरकारलाई असहयोग गरेको जस्तो वातावरण सिर्जना नहुनेतर्फ सबै पक्षले ध्यान दिनुपर्ने बताउँछन् ।
चलचित्र विकास बोर्डका अध्यक्ष दयाराम दाहाल विभागीय मन्त्रालयले मन्त्रिपरिषद्मा गत बुधबार नै प्रस्ताव लगेकाले १० गतेभन्दा अगाडि नै सिनेमा हल खोल्ने निर्णय सरकारले गर्नेका आफू विश्वस्त रहेको बताउँछन् ।