काठमाडौं । करिम बेन्जिमाको दुई गोलको सहयोगमा रियल मड्रिडले स्पेनिस ला लिगा फुटबलमा सहज जित निकालेको छ । मंगलबार राति भएको खेलमा रियलले एथ्लेटिक बिल्बाओसँग ३-१ गोलको जित निकाल्न सफल भएको हो ।

घरेलु मैदानमा भएको खेलमा रियललाई जित दिलाउन बेन्जिमाले दुई गोल गरे । त्यस्तै टोनी क्रुसले एक गोल गरे । उता बिल्बाओका लागि आन्द्रे कापाले एक गोल गरे ।

पहिलो हाफको इन्ज्युरी समयमा टोनी क्रसले गोल गर्दै रियललाई अग्रता दिलाए । पहिलो हाफमा १-० गोलको अग्रता बनाएको रियलले दोस्रो हाफमा थप दुई गोल गर्न सफल भएको हो ।

५२औं मिनेटमा आन्द्रेले बिल्बाओका लागि बराबरी गोल फर्काए । ७४औं बेन्जिमाले गोल गर्दै टिमको अग्रता २-१ गोलमा ल्याए । खेलको इन्ज्युरी समयमा बेन्जिमाले व्यक्तिगत दोस्रो गोल गर्दै टिमलाई ३-१ गोलको जित दिलाए ।

जितसँगै रियलले लिगमा १३ खेलबाट २६ अंक जोडेको छ । पराजित बिल्बाओ १४ अंकसहित तालिकाको १३औं स्थानमा छ ।