सीएनएन । चिनियाँ राष्ट्रिय फर्मा कम्पनी, साइनोफ्रामले निर्माण गरेको कोभिड विरुद्धको खोपलाई बहराइनले स्वीकृत गरेको छ । नागरिकहरुलाई यो खोप लिनका लागि अनलाइन आवेदन पनि खुलाइसकेको छ । 

पेरु सरकारले चाहिँ शनिबार यही कम्पनीको खोप ट्रायलमा समस्या देखिएको बताउँदै स्थागित गरिएको खबर गरेको थियो । उता बहराइनको राष्ट्रिय स्वास्थ्य निरीक्षण निकायले आइतबार यसबारे आधिकारिक जानकारी दिएको हो । तर यसमा साइनोफ्रामले विकास गरेको दुईवटा मध्ये कुन खोप स्वीकृत भएको भन्ने स्पष्ट बताएको छैन । निकायका अनुसार तेस्रो चरणको क्लिनिकल ट्रायलबाट प्राप्त डाटामा सो खोप ८६ प्रतिशत प्रभावकारी रहेको देखिएपछि यस्तो निर्णय गरिएको हो । 

बहराइनको अर्थ मन्त्रालयले अहिले १८ वर्षभन्दा माथिको उमेरका जोकोहीले पनि निःशुल्क खोप प्राप्त गर्न अनलाइनमार्फत आवेदन दिन सक्ने बताएको छ । 

यसै महिना यूएईले पनि तेस्रो चरणको क्लिनिकल ट्रायलको अन्तरिम विश्लेषणपछि साइनोफ्रामकै एक युनिट, ‘बेइजिङ इन्स्टिच्युट अफ बायोलोजिकल प्रडक्ट’ ले निर्माण गरेको खोपको डाटाबारे यस्तै घोषणा गरेको थियो । यूएईले यो खोपको तेस्रो चरणको ट्रायल जुलाइमा सुरु गरेको थियो जसलाई पछि बहराइन, जोर्डन अनि इजिप्टमा पनि विस्तार गरिएको हो ।

साइनोफ्रामले भने यससम्बन्धी अहिलेसम्म कुनै बयान दिएको छैन । अघिल्लो महिना नै बहराइनले अमेरिकाको फाइजर खोपलाई पनि आपत्कालीन प्रयोगका लागि स्वीकृति दिएको थियो । 

अर्कातर्फ पेरुले साइनोफ्रामको खोप ट्रायलका क्रममा एक सहभागीमा गम्भीर असर देखापरेको बताउँदै परीक्षण स्थागित गराएको छ । पेरु सरकारले शनिबार यसबारे आधिकारिक जानकारी दिएको हो । तर बहराइनले योभन्दा अगाडि नै फ्रन्टलाइनका प्रोफेसनलहरुमा आपत्कालीन प्रयोगका लागि यो खोपलाई स्वीकृत गरेको थियो ।

पेरुको स्वास्थ्य मन्त्रालयले घटना खोपसँग सम्बन्धित छ/छैन भन्ने निर्धारण गर्न यसबारे अनुसन्धान भइरहेको बताएको छ । साइनोफ्रामले पेरुमा १२ हजार स्वयंसेवकसहित सञ्चालन गरिरहेको यो ट्रायलको पहिलो चरण सम्पन्न हुन लागेको थियो । स्थानीय ‘कायेतानो हेरेदिया युनिभर्सिटी’ मा यसै अध्ययनसँग सम्बन्धित अनुसन्धानकर्ता जर्मन मलगका अनुसार स्वयंसेवकहरुमा एक सहभागीले खोपका अन्य सामान्य लक्षणबाहेक खुट्टा अत्यन्त कमजोर भएको पनि महसुस गरेका थिए ।